Nuummi inuit marluk coronavirusimik tunillatsissimasut
Nuummi coronavirusertut marluk siumorneqarput - illoqarfiup pingaarnersaanilu aatsaat ukioq manna coronavirusimik tunillatsissimasumik siumuisoqarpoq.
Nunatta peqqinnissaqarfia taama paasissutissiivoq.
Tunillanneqarsimasut Danmarkimiit nunatsinnukarput. Ullunilu tallimassaani misissorteqqinnermut atatillugu ippassaq kingusissukkut tunillatsissimasut paasineqarpoq.
Tunillatsissimasut akuliussimanngillat massakkullu mattusimatinneqarlutik.
Naalakkersuisut nunatsinnut tikittut tikinnerminnit ullut tallimat qaangiunneranni misissorteqqittarnissaannut malittarisassat atuutilerseqqinnikuuaat.
Akuliusimanaveersaarninni pisuttuarsinnaavutit aamma najugaqatigisannut qanillisinnaavutit.
Niuerniarsinnaavutit.
Allanut pulaassanngilatit, pulaartoqassanngilatit, bussissanngilatit, taxassanngilatit suliartussanallu.
Nunatsinnut tikinnermi ullut tallimat qaangiunneranni misissorteqqissaatit. Misissortinnerup tunillatsissimannginneq uppernarsarpagu suliartoqqissinnaavutit nalinginnaasumillu inuunerit ingerlateqqissinnaallugu.
Misissorteqqinnianngikkuit ulluni 14-ini akuliusimanaveersaassaatit aatsaallu ersiuteqanngikkuit suliartoqqillutit.
AAMMA ATUARUK Tusagassiorfik: Pituffimmi inuit pingasut coronartut
Nuummi tuniluuttoqarnissaanik aarlerinartoqanngimmat killilersuisoqassanngilaq.
- Ernumanissamut pissutissaqanngilaq, Nakorsaaneqarfimmi nakorsaq Paneeraq Noahsen oqarpoq.
- Tunillatsissimasut aneqqusaannginnertik malissimavaat, inunnullu allanut tunillaanissaminnut arlaatigut iliuuseqarsimanatik.
Coronavirsusimut tunillatsissimannginnermik uppernarsaamik tunniussisut
Taakku marluk Danmarkimiit aallaleramik, timmisartumut ikisut allat ilutigalugit, coronavirsusimut tunillatsissimannginnermik misissortissimanermik uppernarsaamik tunniussipput. Taamaakkaluartorli Kalaallit Nunaannukannginerminni, soorlu taamaattoqartartoq, tunillatsereersimallutik.
- Maanga tikittut coronavirusimik tunillanneqarsimannginnissaat qulakkeerniarlugu, tikereernermi ullup tallimassaanik misissueqqittarpugut. Virusi ulluni 14-nini timimiisinnaavoq paasineqarnanilu. Taamaattumillu Kalaallit Nunaannut aallartoqannginnerani misissortinnermi tunillatsissimanngitsutut isikkoqarsinnaasarluni. Misissortinngilaataanilu aamma tunillatsissimasoqarsinnaalluni, Paneeraq Noahsen oqarpoq.
AAMMA ATUARUK Nakorsaaneq: Taamaammat akiuussuserneqarsimasut ulloq ataasiinnaq aneqqusaasassanngillat
Tunillanneqarsimasut ajunngitsut nakorsap oqaatigaa.
Illoqarfiup pingaarnersaani coronavirusertumik decemberimi siumuisoqarpoq.
Pituffimmi marluk coronaviruseqartut
Coronap nunarsuarmi ukioq kingulleq tunillaassuutipiluuleruttormat, Kalalallit Nunaanut marsimi annguteqqaarmat Nuummi aallartippoq, kinguneranilu Aasiannut Ilulissanullu apuulluni. Narsamilu ataaseq tunillatsilluni.
Nuummi coronavirusertut eqqaasanngikkaani nunatta avannarlersaani Pituffimmi inuit marluk aamma coronavirsuserput.
Nunatsinni coronaviruseqalermat killilersuutit Namminersorlutik Oqartussanit atuutinneqalersut maana qaukkarneqaleruttorput.
Silami katersuusinnaasut amerlanerpaamik 250-iussasut atuukkunnaarpoq. Illup iluanilu amerlanerpaamik katersuusinnaasut 100-nissaat atuukkunnaarpoq, Kalaallit Nunaannullu tikittut tamakkiisumik akiuussuserneqarsimappata juunip aallaqqaataa aallarnerlugu ulluni tallimani akuliusimanaveersaartariaqanngillat. Taamaakkaluartoq aqaguani misissorteqqinnissami tungaanut akuliunnaveersaassallutik.
Nalunaaqutaq 13:52 naqqiissut: Siusinnerusukkut allapparput Nuummi ukioq ataaseq sinnerlugu coronavirusertoqarsimannginnerarlugu. Tamanna eqqunngilaq. Decemberimi tamaanimi coronavirusertoqarmat. Kukkunerput knr.gl -imiit ajuusaarutigaarput.