Nakorsaaneq: Taamaammat akiuussuserneqarsimasut ulloq ataasiinnaq aneqqusaasassanngillat
Juunip aallaqqaataat aallarnerfigalugu nunatsinnut tikittut coronamullu tamakkiisumik akiuussuserneqarsimasut ulluni tallimani aneqqusaasannginnerat atorunnaassaaq.
Angerlarsimaannaqqusaanerli pinngitsuuinneqassanngitsoq, Naalakkersuisut paasissutissiipput.
Aappassaanik kapitereersimagaluarluni nunatsinnut tikinnermi toqqaannartumik aninaveersaartoqalissaaq, ullunili tallimani utaqqeqqaarnani tikinnermi aqaguani, misissuisarfik ammappat, misissorteqqittoqarsinnaavoq.
Akiuussuserneqareersimaguit covid-19-imik tunillatsissimaguit napparsimangaatsialernissat ilimanarpallaanngilaq. Allanulli suli aarlerinartorsiortitsissaatit taamaammallu nunatsinnut tikinninniit ingerlaannaq aninaveersaalissaatit.
AAMMA ATUARUK Coronamut tamakkiisumik akiuussuserneqarsimasut aninaveersaartariaarutilersut
Tamakkiisumik akiuussuserneqareersimasup misissortinnerani tunillatsissimanngitsoq uppernarsarneqarpat pineqartoq suliartorsinnaavoq, katerinninnernut peqataasinnaavoq iliuusererusutamilluunniit iliorsinnaalluni.
Ulluni tallimani aninaveersaaqqusaalernissap pisariaqarunnaarneranut suna tunngavilersuutaava?
- Akiuussuserneqarsimasut tunillatsissimanermit malunniuteqalernissaata ilimanassusaa annikitsuararsuussaaq. Naak tunillatsissimagaluarlutik napparsimalernissaat qaqutigoortuussaaq. Taamaakkaluartorli nappaat iggiannit qingaanniillu allanut tunillaasinnaavoq, tamannali misissoqqinnerisigut paasineqartassaaq, Henrik L. Hansen KNR-imut oqarpoq.
Naalakkersuisut nunatsinnut tikittut tikinnerminnit ullut tallimat qaangiunneranni misissorteqqittarnissaannut malittarisassat atuutilerseqqinnikuuaat.
Angerlarsimaannarninni pisuttuarsinnaavutit aamma najugaqatigisannut qanillisinnaavutit.
Niuerniarsinnaavutit.
Allanut pulaassanngilatit, pulaartoqassanngilatit, bussissanngilatit, taxassanngilatit suliartussanallu.
Nunatsinnut tikinnermi ullut tallimat qaangiunneranni misissorteqqissaatit. Misissortinnerup tunillatsissimannginneq uppernarsarpagu suliartoqqissinnaavutit nalinginnaasumillu inuunerit ingerlateqqissinnaallugu.
Misissorteqqinnianngikkuit ulluni 14-ini angerlarsimaannassaatit aatsaallu ersiuteqanngikkuit suliartoqqillutit.
Tamakkiisumik akiuussuserneqarsimasoq nammineq ersiuteqanngikkaluarluni covid-19-imik tunillatsissimalluni tunillaassuisinnaava? Akiuussutissaq timimi akiuussutissaliortannguatsiarpoq, kisianni virus timimiiginnarsinnaava?
- Aap taamaattoqarsinnaavoq. Akiuussutissaq covid-19-imik tunillatsinnerup kinguneratigut napparsimarujussualinnginnissamut illersuutaavoq, Henrik L. Hansen oqarpoq.
- Tamakkiisumik akiuussuserneqarsimasoq peqqikkaluarluni tunillatsissimaguni allanut tunillaasinnaavoq. Tamanna soorunami tunillaassuisoqanngivitsinniarlugu pinaveersaartinniarparput. Taamaammat misissortinnissami tungaannut aninaveersaassapput, Henrik L. Hansen oqarpoq.
Inuit tamakkiisumik akiuussuserneqarsimanngitsut covid-19-imilli tunillatsissimasutut uppernarsarneqarnikuusimasut malittarisassanut nutaanut ilaatinneqanngillat.
Taakku akiuussuserneqarsimanngitsut allat assigalugit ulluni tallimani aninaveersaartassapput.
Tamakkiisumik akiuussuserneqarsimanissamut marloriarluni akiuussutissamik talikkut kapitissimasoqassaaq. Tassa imaappoq assersuutigalugu Modernamit imaluunniit Pfizer/Biontechimit akiuussutissamik ataasiarluni kapitissimanissaq naammanngilaq.
