Coronamut tamakkiisumik akiuussuserneqarsimasut aninaveersaartariaarutilersut
Nunatsinnut angalaguit coronamullu akiuussutissamik tamakkiisumik kapitereersimaguit juunip ulluisa aallaqqaataat aallarnerfigalugu ulluni tallimani misissortinnissannut utaqqeqqaartariaqarunnaassaatit.
Angerlarsimaannaqqusaanermilli pinngitsuueqqissaartoqarnavianngitsoq, Naalakkersuisut paasissutissiipput.
AAMMA ATUARUK Angerlarsimaannartussaatitaasoq Nuummi imerniartarfissiornini pissutigalugu tigusaasoq
Naak aappassaaneertumik kapiteersimagaluarlutut nunatsinnut tikinnerminni toqqaannartumik aninaveersaalissapput – ullunili tallimani utaqqeqqaarani tikinnerup aqguani misissuisarfik ammappat misissorteqqittoqarsinnaavoq.
Naalakkersuisut nunatsinnut tikittut tikinnerminnit ullut tallimat qaangiunneranni misissorteqqittarnissaannut malittarisassat atuutilerseqqinnikuuaat.
Angerlarsimaannarninni pisuttuarsinnaavutit aamma najugaqatigisannut qanillisinnaavutit.
Niuerniarsinnaavutit.
Allanut pulaassanngilatit, pulaartoqassanngilatit, bussissanngilatit, taxassanngilatit suliartussanallu.
Nunatsinnut tikinnermi ullut tallimat qaangiunneranni misissorteqqissaatit. Misissortinnerup tunillatsissimannginneq uppernarsarpagu suliartoqqissinnaavutit nalinginnaasumillu inuunerit ingerlateqqissinnaallugu.
Misissorteqqinnianngikkuit ulluni 14-ini angerlarsimaannassaatit aatsaallu ersiuteqanngikkuit suliartoqqillutit.
Tamakkiisumik akiuussuserneqarsimasup misissortinnerani tunillatsissimanngitsoq uppernarsarneqarpat taanna suliartorsinnaavoq, katerittuni peqataasinnaavoq imaluunniit arlaannik iliuusererusutaminik iliorsinnaalluni.
Aamma tamakkiisumik akiuussuserneqarsimasut Danmarkimit nunaniilluunniit allanit tikittut saqqummiiartorsinnaapput pikkorissartitsisinnaallutillu.
Tamakkiisumik akiuussuserneqarsimaneq tassa aappassaaneertumik kapitissimaneq. Taamaammat assersuutigalugu Modernamit Pfizerbiontechimiilluunniit akiuussutissamik ataasiarluni kapitissimaneq naammanngilaq.
Tunillatsinnikuusimasut malittarisassani nutaani ilaatinneqanngitsut
Inuit tamakkiisumik akiuussuserneqarsimanngitsut, Covid-19-imilli tunillatsinnikuusimasut malittarisassanut nutaanut ilaatinneqanngillat.
Taakku suli akiuussuserneqarsimanngitsutulli ulluni tallimani aninaveersaassapput.
Corona pissutigalugu killilersuinerit maanna qasukkarneqaleruttorput.
Silami katerinnissamut killilersuinerit apriilip ulluisa 19-ianni aamma atorunnaarsinneqarput. Tamatuma siornatigut inuit amerlanerpaamik 250-it kisimik katereqqusaagaluarput – maannalu killilersuineqarunnaarluni.
Ammaaveqqinnissaq suli piariinngitsoq
Illup iluani inini isersimasinnaasut affaannaasa isersinnaanissaannut aamma killilersuisoqarunnaarpoq.
AAMMA ATUARUK Atisaarniarfiup angerlarsimaannartussaagaluarlutik pisiniartut anisikkai
Nunatsinnut aqqut aamma ammaamiaqqinneqarnikuuvoq, tassa corona pillugu allattoqarfimmit akuersissuteqartoqaqqaartinnagu nunatsinnut angalasoqarsinnaaleqqinnikuuvoq.
Nunattali ammaveqqinnissaa aatsaat 18-ileereersimasut 75 procentii akiuussuserneqareernerani pisinnaavoq. Naalakkersuisut siulittaasuata, Múte B. Egedep tamanna aggustimi septembarimiluunniit aatsaat pisinnaassasoq naatsorsuutigaa.
Coronamik tunillatsissimasutut uppernarsarneqarsimasut Pituffimmiittut maanna marluupput.
Nunatsinni tamakkiisumik akiuussuserneqarsimasut 8.126-upput.
