Angerlarsimaannartussaatitaasoq Nuummi imerniartarfissiornini pissutigalugu tigusaasoq
Pineqartumut, angerlarsimaannartitaasussaagaluarluni arfininngormat imerniartarfiliarsimasumut akiligassiisoqarsinnaavoq.
Pineqartormi – Danmarkimit tikinnermi kingornatigut angerlarsimaannartussaatitaagami – imerniartarfieeqqusaanngilaq.
Politiit pigaartui tamanna pillugu nalunaarfigineqarput, politiillu sumiiffiusumut apuukkamik inuk pineqartoq politiit nassuiaaneratut ”aalakuungaatsiarpoq”.
AAMMA ATUARUK Soraarsitsineq akiligassiinerlu: Inuit sisamat coronamut atatillugu unioqqutitsisimasutut unnerluutigineqartut
Angerlarsimaannartussaatitaasoq nunatsinnut ullut aqqaneq-marluk matuma siorna tikissimalluni politiinut oqarpoq, piffimmiillu qimaariaraluarluni.
Angerlarsimaanaqqusaanermut maleruagassat:
- Kalaallit Nunaannut tikikkuit ullut tallimat angerlarsimaannaqqusaavutit
- Ullut tallimassaani misissorteqqissaatit
- Angerlarsimaanaqqusaanivit nalaani pisuttuarsinnaavutit, najugaqatitit attaveqarfigisinnaavatit niuerniarsinnaallutillu
- Niuerniarninni assiaquteqarnissaq piumasaqaataavoq
- Pulaasanngilatit, pulaartoqassanngilatit, ataatsimoorfiusuniisanngilatit, bussissanngilatit, taxassanngilatit suliartornalluunniit
- Ullut tallimassaani misissortinnianngikkuit, tikinnermiit ullut 14-it angerlarsimaanassaatit.
Taannali tigusarineqarpoq coronamullu malittarisassanik unioqqutitsisutut pasineqarluni.
Pineqartup nunatsinnut sisamanngornermi tikissimanini kingorna nassuerutigaa – taamaammallu ulluni tallimani angerlarsimaannartussaagaluarluni.
Kalaallit Nunaanni Politiit inatsisinik unioqqutitsinerup annertussusaa maanna misissuiffigaat, taamaalillutillu malittarisassanik allanik unioqqutitsisoqarsimanersoq paasiniarlugu.
Tunillatsissimanngitsoq
Unioqqutitsisoq misissorteqqippoq, taannalu coronamik tunillatsissimanngilaq.
Kalaallit Nunaanni politiit inunnik angerlarsimaannartussaatitaanerminnik unioqqutitsisunik naammattuuivallaarneq ajorput.
Taamaakkaluartorli nunatsinnut tikittut malittarisassanik malinninnissaat erseqqissaatigaat.
- Inuit allat atugarisaat misilerarlugillu unammillerpatit. Taak nunatsinnukartussamut timmisartumut ikinissannut ullualuit sioqqullugit tunillatsissimannginnerit uppernarsarneqarsimagaluartoq tamanna aallarnissannut akunnialuit sioqqullugit tunillatsinnginnissannut qulakkeerinngilaq, pigaartoqarfiup aqutsisua, Johan Westen oqarpoq.
AAMMA ATUARUK Coronamut maleruaqqusanik unioqqutitsineq: Aasianni unioqqutitsisoq akiliisinneqassasoq
- Tikittut tamarmik tikinnerannit ullut tallimat qaangiunneranni tunillatsissimanngitsutut uppernarsarneqarnerisigut tunillaassuuttoqalinnginnissaanut taamaallaat qulakkeerisinnaavugut.
Angerlarsimaannarnissamut malittarisassanik malinninngitsumut siornatigut akiligassiisoqarnikuuvoq, taakkunani 18-inik ukiulimmut Aasianniittumullu akiligassiisoqarnikuuvoq.
Aamma angutit sisamat 20-t 24-llu akornanni ukioqarrut Nuummut MT Højgaardimut suliartortut akiligassinneqarnikuupput.
Naqqiissut: Ilanngutassiami siullermi inuk imerniartarfiliarsimasoq akiligassinneqarsimasoq allassimagaluarpoq. Tamanna politiit tusagassiuutinut nalunaarummi namminneerlutik paasissutissiissutigaat. Kalaallit Nunaanni Politiit tamatuma kingorna suliaq pillugu nutaamik nalunaaruteqaqqipput - tassanilu akiligassiineq peerneqarsimalluni. Taamaammat inuk pineqartoq akiligassinneqanngilaq - "Kalaallit Nunaanni Politiit inatsisinik unioqqutitsinerup annertussusaa maanna misissuiffigaat, taamaalillutillu malittarisassanik allanik unioqqutitsisoqarsimanersoq paasiniarlugu" politiit tusagassiuutinut nalunaarummi nutaami paasissutissiipput.
