Tusagassiorfik: Pituffimmi inuit pingasut coronartut
Pituffimmi inuk ataaseq coronami tunillatsissimasoq paasineqaqqippoq.
Nunatta nakorsaanera Henrik L Hansen Sermitsiaq.AG-mut taama paasissutissiivoq.
Pituffimmi inuit marluk coronamik tunillatsisimasut tallimanngormat nalunaarutigineqarpoq.
Aappaa maajip arfernani tikinnerminiit allamut attaveqarani mattusimasimavoq.
AAMMA ATUARUK Pituffimmi coronamik tunillagaasulik: Tassanngaanniit tassungaluunnit angalasoqassanngilaq
Tunillatsissimasup aappaa Danmarkimiit Kangerlussuakkoorluni apriilip 29-ani Pituffimmut tikippoq. Taanna ulluni arfineq marlunnik mattusimareerluni misissorteqqinnermini coronarneranik ersiuteqanngeqqaariarluni, kingorna misissorteqqinnermini tunillatsissimasoq paasineqarpoq.
- Katillugit inuit pingasut maanna coronamik tunillatsissimapput. Taakkunannga marluk USA-mi tunillatsissimasut paasivagut. Pingajuat Pituffimmi tunillatsissimavoq. Pineqartoq coronamut ersiuteqalerpoq kingunerisaanillu tunillanneqarsimasoq paasineqarpoq, nakorsaaneq, Henrik L Hansen Sermitsiaq.AG-mut oqarpoq.
Pituffik matoqqasoq
Pituffimmiit aallartoqarsinnaananilu tikittoqarsinnaanngilaq, tunillaassortunik nappaalanersuaqarneranut ataatsimiititaliarsuup Pituffik matunikuummagu.
Nunatta sinneraniit Pituffimmukartoqarsinnaanngilaq, sulisullu immikkut akuerisaallutik taamaallaat Kangerlussuakkoorlutik angalasinnaatitaapput.
Pituffik juunip aallaqqaataata tungaanut matoqqassaaq.