Pituffimmi coronamik tunillagaasulik: Tassanngaanniit tassungaluunnit angalasoqassanngilaq
Pituffmmi inuit marluk covid-19-mik tunillatsissimasut naammattoorneqarput.
Taamaammat tunillaassortunik nappaalanersuaqarneranut ataatsimiititaliarsuaq tassanngaanniit tassungaluunniit angalaqqusiunnaarpoq.
Tassalu nunatsinni tamaneersut Pituffiliarsinnaanngillat, sulisulli Kangerlussuakkoorlutik Pituffiliarsinnaatitaapput.
Peqqussut juunip aallaqqaataata tungaanut atuuppoq.
AAMMA ATUARUK USA-mi inuit coronamut tamakkiisumik akiuussuserneqareersimasut 66 millionit missilioraat
Inuit pineqartut covid-19-imik tunillatsissimasut sisamanngornermi uppernarsineqarpoq mattusimatinneqarlutillu.
Tunillatsissimasoq ataaseq Kangerlussuakkooqqaarnani Pituffimmut maajip ulluisa arfernani tikippoq, toqqaannarlu mattulluni taamaattumillu inunnut allanut attaveqarsimanani.
Tunillatsissimasup aappaa Danmarkimiit Kangerlussuakkoorluni apriilip ulluisa 29-anni Pituffiliarpoq. Tikinnermini, ullunilu arfineq marlunni mattusimanermi kingorna, misissugassamik tigusiffiginerani covid-19-imik tunillatsissimanngitsoq takuaat, kingornali covid-19-imut ersiuteqalerluni.
Pineqartoq misissorteqqippoq covid-19-imillu tunillatsissimasoq sisamanngornermi uppernarsineqarpoq.
Tunillatsissimasoq tunillatsinnermi nalaani sulilereersimavoq suleqatinilu attaveqarfigisimallugit.
Inuit 20-it 25-llu akornanniittut tunillatsissimanngitsut maannamut uppernarsineqareerpoq.