Naalakkersuisoq Tasiilami ilinniartitsisussaaleqineq pillugu: Akuersaarneqarsinnaanngilaq
Nunatsinni ilinniartitaaneq pillugu naalakkersuisoq Tasiilami ilinniartitsisussaaleqineq pillugu immikkut oqaaseqarpoq, Tasiilami Alivarpimmi sinaakkutissat malinneqarnissaat unammillernartinneqarpoq.
Kisitsisit pissutsinik piviusunik takutitsisuupput.
Aggustimiit Apriili tikillugu ilinniartitsisut 62-iusunit qulit soraarniuteqarput, tassalu ilinniartitsisut 22-t amigaatigineqarlutik.
Tasiilami Alivarpimmi ilinniartitsisussaaleqineq
- Tasiilami Alivarpimmi sulisut 62-iupput taakku pingajorarterutaat timelæreriupput.
- Tassa imaappoq, Tasiilami Alivarpimmi sulisut pingajorarterutaat ilinniartitsisutut ilinniarsimanngillat, pingajorarterutaallu Danmarkiminngaaneersuullutik.
- Tasiilami Alivarpimmi ilinniartitsisut ilinniarsimasut 22-t amigaatigineqarput.
Situationen ærgrer naalakkersuisoq Peter Olsen fra IA.
Tamanna naalakkersuisumit Peter Olsenimit (IA) uggorineqarpoq.
- Soorunami tamaanga killissimanerput naalakkersuisuninngaanniit uggoraarput, aamma ajuusaarnartutut isigivarput. Ajorpoq pitsaasuunngilaq, aamma akuerineqarsinnaanngilaq. Siuarsaanngilaq kinguarsaataaginnarpoq. Naalakkersuisuninngaanniit assorsuaq ilungersunartutut isigaarput aamma tiguarput, Peter Olsen oqarpoq.
Tasiilami ilinniartitsisussaaleqineq nutaarsiassaanngilaq, aamma nunatta sinnerani ajornartorsiutaavoq. Taamaammallu nunatsinni kommunit tamanna pillugu Peter Olsenip ataatsimeeqatiginiarlugit aalajangerpoq.
- Tamannarpiaq pillugu atorfilittakka suliakkernikuuakka kommunit, imaakkamiuna ajornartorsiut Tasiilamiinnaanngilaq, ajornartorsiut sumi tamaani atuuppoq kommunit tamarmik eqqorneqarput taamaattumik piaarnerpaamik atorfilittakka suliakkerpakka piaarnerpaamik ajornartorsiut pillugu aaqqiivigineqarnissaat pillugu massakkorpiaq kommunit borgmesterillu naapeqatigalugit oqaloqatiginissaalu suliaralugu aallartipparput.
Ilinniarsimasut amerlanerusut pisariaqartinneqartut
Nunatsinni ilinniartitsisut 2020-miit 2021-mut 900-t sinneqartunit 166-it ilinniarsimanatik ilinniartitsisarput. Tassa timelæreriupput.
Tasiilami Alivarpimmi ilinniartitsisut 62-it pingajorarterutaat timelæreriupput.
Nunatsinni meeqqat atuarfianni immikkut ittumik ilisimatusarnikoq, Mitdlaraq Lennert, nunatsinni ilinniartitsisussaaleqineq aaqqiiviginiarlugu, ungasianiit atuartitsinerup atorneqarnerulernissaa tikkuarpaa. Sinerissamilu ilinniartitsisunut najugaqarfiit pitsaanerusut amigaatigineqartut taanna isumaqarpoq.
AAMMA ATUARUK Ekspert: Eleverne taber, når skolens voksne ikke kan samarbejde
Kommuneqarfik Sermersuumi meeqqanut atuarfeqarnermullu ataatsimiititaliami siulittaasuata, Juaaka Lyberthip, Tasiilami najugaq qimannagu ilinniartitsisunngorniarsinnaanerup ammaanneqarnissaa sapaatit akunnerata siuliani apersorneqarami piumasaraa.
Najugaq qimannagu ilinniartitsisunngorniarsinnaaneq, Kalaallit Nunaanni Universitetimit, tassa ilisimatusarfimmiit, ingerlanneqartarpoq. Taanna Nuummi atuarneqarsinnaavoq, ungasianiillu atuarneqarsinnaalluni. Tassalu Nuummiinngikkaluarluni ilinniarneqarsinnaalluni.
Tamanna Peter Olsenip maluginiaqquaa.
- Ilinniarfissuup qupperneranut iseraanni tassani takuneqarsinnaavoq najugaq qimannagu ilinniartitsisunngorniartarneq periarfissaavoq. Tasiilamiikkaanni, Ittoqqortormiiniikkaanni, Savissivimmiikkaaniluunniit, sumiikkaluaraanniluunniit nunatsinni, piumasaqaatit naammassisimagaanni periarfissaavoq.
Najugarisaq qimannagu ilinniartitsisunngorniraannili GUX-imi ilinniakkamik naammassisimanissaq piumasaqaataavoq.
GUX-imik ilinniagaqarsimanngikkaanni najugaq qimannagu aamma ilinniarneqarsinnaavoq, taanna E-GUX-imik taaguuteqarpoq, ukiullu marluk ilinniarneqartarluni.
