Naalakkersuisoq: Piareersarfiit aningaasaliiffigineqassapput

Piareersarfinnut aningaasaliissutissat meeqqat atuarfiannit naammassereernermi ilinniarfiusinnaasunut allanut agguaanneqassasut Inuit Ataqatigiit kissaataat naalakkersuisup isumaqatiginngilaa.
Randi Vestergaard Evaldsen
- Allanik ujaasisimavugut pisortaqarfimmiit tassanilu Piareersarfiit attornagit PKU-kontomiik isumaqatigiinniutissamik nassaarpugut 3 millionit naliganut, Randi Vestergaard Evaldsen oqarpoq. Assi © : KNR
novembarip 17-at 2015 14:15

Aningaasanut inatsisissaq 2016-imoortoq partiit amerlanerussuteqartut akuerseqataaffigissappassuk, Inuit Ataqatigiit Naalakkersuisut Piareersarfinnut 23 millionit koruunit ukiup tullianut aningaasaliissutiginiarlugit siunnersuutaat ilinniarfeqarfinnut allanut atorneqassasut kissaatigaat.

- Atuarfik qatsukkukku, 16-inillu ukioqarlutit, Piareersarfimmi ilinniarnerit ingerlateqqiinnissaa eqqortuunera qularnartoqartippara. Inuusuttunut inuunerminni suniarnerlutik nalunngisaqartunut Piareersarfik naleqqunneruvoq, taakkununngalu atugassiassatut aallartinneqarluni, Naaja Nathanielsenip ippassaq 23 millioninit Naalakkersuisut Piareersarfinnut aningaasaliissutiginiaagaannit 13 millionit koruunit sooq allanut atorusunneritsik KNR-imut taama nassuiaatigaa. 13 millionit koruunimmi meeqqat atuarfiata naammassereernerani ilinniarfiusinnaasunut allanut Inuit Ataqatigiit aningaasaliissutigerusuppaat.

Aamma atuaruk Piareersarfinnut aningaasaliissutigineqarniartut IA-mit allatut agguaanneqarusupput

Inuussutissarsiornermut, Suliffeqarnermut Niuernermullu Naalakkersuisoqarfiup Randi Vestergaard Evaldsenip naalakkersuisuuffigisaata Piareersarfiit akisussaaffigai.

Naaja Nathanielsenillu oqariartuutaanut taanna isumaqataanngilaq.

- Iluaqutissanik saqqummiussinikuuvugut. Soorlu inuusuttut 250-it allat inissaqalersillugit piareersarfinni. Taakku pingaartorujussuugamik suliarinissaat pimoorunnissaallu, Randi Vestergaard Evaldsen oqarpoq.

Inuusuttut Piareersarfimmi atuarsimasut ilinniaqqiffinnut ingerlariaqqittartut aamma suliffeqalertarmata Piareersarfik pisariaqartinneqartillugu iluaqutigineqartillugulu aningaasaliiffiginissaa pingaaruteqartoq taassuma aamma oqaatigaa.

Inuit Ataqatigiit siunnersuutaat naalakkersuisup isumaqataaffiginngilai naaperiarfiusinnaasumillu siunnersuuteqarluni. Tassa Piginnaasanut ineriartortitsinissamut aningaasaliissutininngaannit Inuit Ataqatigiit siunnersuutaannut nuussisoqassasoq.

- Allanik ujaasisimavugut maanngaanniit pisortaqarfimmiit tassanilu Piareersarfiit attornagit PKU-kontomiik isumaqatigiinniutissamik nassaarsimavugut 3 millionit naliganut, Randi Vestergaard Evaldsen oqarpoq.

Aamma atuaruk VIDEO Piareersarfinnut aningaasaliissutit amerlisut

Taakku 3 millionit koruunit Ilinniartitaanermut Naalakkersuisoqarfimmut nuunneqassapput, meeqqat atuarfiat naammassereernerani ilinniarfiusinnaasunut aningaasaliiffigineqarnissamut qinnuteqarfigineqarsinnaanngorlugit, Naaja Nathanielsenili isumaqarpoq 3 millionit koruunit naammanngitsut.

- Eqqarsaatigisariaqarparput Nunatsinni marlunnik efterskoleqartoq aamma højskolit marluusut. 3 millionit koruunillu aningaasaliissutiginissaat taakkununnga naammanngillat, Naaja Nathanielsen oqarpoq.