Piareersarfinnut aningaasaliissutigineqarniartut IA-mit allatut agguaanneqarusupput
Aningaasanut inatsisissatut siunnersuutip Inatsisartunit pingajussaaneerlugu suliarineqannginnerani aningaasaliissutigineqarniartut ilaasa meeqqat atuarfiata naammassereernerani ilinniarfiusinnaasunut allanut siaruartinneqarnissaat, Inuit Ataqatigiit piumasarivaat.
- Piareersarfinni aallartikkusuttuni utaqqisorpassuaqartarnera ajornartorsiutaavoq, inuusuttunullu tamanut pitsaanerpaajunngitsoq aamma isumaqarluta. Piareersarfiimmit sulilluartoqaraluarpoq, inuusuttunullu amerlasuunut iluaqutaalluni. Aningaasaliissutaaniartulli ilaasa højskolinut, efterskolinut aamma isumaginninnermi suliniutilinnut agguataarneqarnissaat uagut isumaqarpugut, Inuit Ataqatigiit sinnerlugit Inatsisartut aningaasaqarnermut ataatsimiititaliaanni ilaasortaq, Naaja Nathanielsen oqarpoq.
Aamma atuaruk Aningaasanut inatsisissatut siunnersuummi oqallinneq kisitsiseqarpallaanngitsoq
Piareersarfiit aningaasaliiffigeqqinniarnerani 23 millionit koruuniusuni, 13 millionit koruunit ilinniarfiusinnaasunut allanut atorneqassasut, Inuit Ataqatigiit isumaqarput.
Aningaasallu højskolinut aamma efterskolinut 5 millionit koruuninik immikkut agguataarneqarnissaat, 3 millionit koruunillu isumaginninnermut suliniutilinnut tunniunneqarnissaat piumasaralugu.
- Atuarfik qatsukkukku, 16-inillu ukioqarlutit, Piareersarfimmi ilinniarnerit ingerlateqqiinissappit eqqortuunera qularnartoqartippara. Inuusuttunut inuunerminni suniarnerlutik nalunngisaqartunut Piareersarfik naleqqunneruvoq, taakkununngalu atugassatut aallartinneqarluni, Naaja Nathanielsen oqarpoq.
Aamma atuaruk VIDEO Inuusuttorpassuit suliffissaaleqinerat aarlerinarpoq
Taassuma isumaginninnermut suliniutilinnut aningaasaliinissaq immikkut ersersinniarpaa.
- Inuusuttoq ullaaminngaanniit unnuap tungaanut nakkutigineqartarput, timersornerlu pingaartillugu ullormi suliassat aaqqissuunneqartarlutik. Inuup timaata tamaat qarasaannaanngitsorlu taamaalilluni atorneqartarpoq. Timip atornerani aamma iluamik qasulernissaq ilinniarneqartarpoq, innarfissamut piffissat ilinniarneqartarluni, ullaakkullu iteriarluni ullaakkorsiutinik nerilluni. Inuunermi atugassanik piginnaanernik inuusuttoq taama pissarsiaqartarpoq, Naaja Nathanielsen oqarpoq.