VIDEO Piareersarfinnut aningaasaliissutit amerlisut

Inuusuttut unittoorsimasut imaluunniit ilinniagaqarusuttut Piareersarfinni ingerlariaqqinnissamut piareersartarput.

Maanna aningaasanut inatsit Inatsisartunit akuerineqarsimalersumi takuneqarsinnaavoq Piareersarfiit Piareesarfiit 50,5 millionit koruuninik aningaasaliiffigineqassasut. Tassa siornatigornit 7 millionit koruuninik amerlanernik tapiiffigineqarlutik.

Tamannalu Piareersarfimmi atuartut ilaata Linda Fiskerip nuannaarutigaa.

- Imaallaat inuusuttut inersimasullu ilinniarnissaminnut utaqqerujussuartarunnaassapput. Taavalu siunissami ilinniartussat amerlatseriassallutik, Linda Fisker naliliivoq.

Linda inuusuttuuvoq 20-nik ukiulik. Taassuma Piareersarfimmi aallartissimanngitsuuguni unittooqqaannarsimassagaluarnini takorloorsinnaavaa.

- Imminut tatiginerulernikuuvunga, taavalu inunnik oqaloqateqarnissara inuillu akornaniinnissara ajornannginnerulernikuulluni. Ilinniarnerullu tungaatigut pitsanngorriartupilussuullunga, Linda Fisker KNR-imut oqaluttuarpoq nangillunilu;

- Piareersarfimmiinngitsuuguma immaqa Piorsaavimmi ullaakkut makinnissaq suli ilinniassagaluarpara.

Qanoruup ilanngutassiaa takuuk.