Naalakkersuisoq: Atuisut mittarfiit akilersortariaqarpaat
Mittarfiit heliportillu aserfallatsaaliorneqarnissaannut mittarfinnik atuisut akiliisuunerusariqartut, Naalakkersuisut aalajangerput.
Attaveqaqatigiinnermut naalakkersuisoq Karl Frederik Danielsen Air Greenlandip Mittarfeqarfinni akitsuusersueriaaseq nutaaq isornatorsioreeraa tusagassiutinut taama allappoq.
AAMMA ATUARUK Air Greenland: Akitsuuteqarnerulerneq angalanermut akisunerulersitsivoq
- Akigititat allanngortinneqarnerat nuannarineqarneq ajorpoq, kisianni attaveqaqatigiinnerup aserfallakkiartunnginnissaanut aningaasaleeqqittarnissaq pisariaqarluinnarpoq, Karl Frederik Danielsen allappoq.
Naalakkersuisullu tassa aningaasanut inatsisikkut aningaasanik immikkoortitsinatik akit qaffannissaat qinerpaat.
Mittarfeqarfiit aserfallatsaaliinissamut amerlanerusunik aningaasassaqanngippata nunatsiinni mIttarfiit heliportillu angallannermut aqutsisoqarfimmit matuneqaratarsinnaapput. Taamaammat Naalakkersuisut suliffeqarfiup akitsuutinik qaffaanissaa akitsuusersueriaatsimillu nutaamik atuutilersitsinissaa akuerisimavaa.
Ajornartorsiut piulerpoq, Mittarfeqarfiit aserfallatsaaliinermut naammattunik aningaasanissamut ukiuni arlalinni aningaasassaaleqereersoq.
Air Greenland-ip pisortaata akitsuusersueriaasissaq ugguarnartippaa
Akitsuutit nutaat Air Grenlandimut aappaagu 17 millionit koruuninik akeqarnissaat, taamaammallu timmisartorneq akisunerulissasoq, piginneqatigiiffiup sapaatit akunneranni kingullermi nalunaarutigaa. Ingammik nunatta iluani ukiukkut timmisartorneq akisuunerulissaaq, tamannalu Air Greenlandip naammaginartinngilaa:
- Taamaalinissaa uggornalaarpoq. Ukiukkummi angalasut unnuisarfinnilu unnuisartut ikinnerusarmata, amerlanernik ukiukkut angalasoqarnerulersikkusukkaluarparput, Jacob Nitter Sørensen oqarpoq.
KNR-p Karl Frederik Danielsen apersorniarsaraa, sooq akitsuuseriiaatsimik, Nunattta iluani ukiukkut timmisartuussinerup akitsorneranik kinguneqartumik, qinersisimanersut apeqqutigiumallugu. Taava mittarfeqarfiit naatsorsuutai naaperlugit suliffeqarfik aserfallatsaaliinissamut aningaasanik 1 milliard koruuninik amigaateqarnera Nalakkeersuisut qanoq aaqqinniarneraat paaserusupparput.
