Mittarfeqarfiit akitsuutit qaffappaat.

Air Greenland: Akitsuuteqarnerulerneq angalanermut akisunerulersitsivoq

Timmisartumik ukiortaamiit angalaniaruit akisunerunissaa naatsorsuutigilereersinnaavat. Mittarfeqarfiimmi atuisunut akigititaminik qaffaammat angalanissamut billitsit akii qaffanneqartariaqassasut Air Greenlandimit oqarput.

Akitsuutinik qaffaaneq atuisunut 2020-mi 17 millionit koruuninik naleqassaaq. Atuisunillu tamanna matussuserneqartariaqartoq nutaarsiassaqartitsivik Sermitsiaq.ag allappoq.

Nuummiit Københavnimut uterlugulu billetsi assersuutigeriarutsigu, taanna 145 koruuninik akisunerulissaaq. Illoqarfinnili avinngarusimanerusuni akitsuutit amerlanerussapput, Upernavimmiit Paamiuniillu Københavnimut utimullu billetsi 365 koruuninik akisunerulissagami.

Nunattami iluani silaannakkut angalanermi mittarfinnut arlalinnut aqqusaaqqaartoqarsinnaasarpoq, mittaqattaarnermilu qaavatigut akiligassat amerlisarput.

Mittarfeqarfiit isumannaatsunik ullutsinnullu tulluartunik atortoqarnissamik pisariaqartitsinerat, Air Greenlandimi pisortap paasisinnaalluarpaa, akinilli qaffaarujussuartariaqarnermik kinguneqarnera uggoraa.

- Air Greenlandip pisisartuinut equisussamik akinik qaffaarujussuarniarneq assut uggornarpoq, Jacob Nitter Sørensen oqarpoq.

- Air Greenlandip pisisartuinut equisussamik akinik qaffaarujussuarniarneq assut uggornarpoq, Jacob Nitter Sørensen oqarpoq.

Sørensen: Ukiukkut angalasut amerlisikkusuppavut

Akitsuutit aaqqissugaanerat pisortaanerup aamma iluarinngilai, akitsuusersuinerummi kinguneranik aasakkut ukiukkullu billetsit akeqqatigilersittussaavai.

- Taamaalinissaa uggornalaarpoq. Ukiukkummi angalasut unnuisarfinnilu unnuisartut ikinnerusarmata, amerlanernik ukiukkut angalasoqarnerulersikkusukkaluarparput.

Mittarfeqarfiit tulliani akitsuusersueqqitsigatik qanoq aaqqissuisinnaanerannik oqaloqatiginneqqaarnissaa, Jakob Nitter Sørensernip siunnersuutigaa:

- Piffissami angallaffiunnginnerusumi ilaasoqarnerulernissaq uagut soqutigisaraarput - nunaqavissunik takornarianillu - tamatuminngalu piviusunngortitsiniaaqataarusussinnaavugut, Jakob Nitter Sørensen oqarpoq.

Mittarfeqarfiit akitsuutinik qaffaanissartik juulip qaammataani nalunaarutigaat. 2013-imili akinik qaffaasimannginneq suliffeqarfiup aningaasaqarneranut 25 millionit koruuninik naleqarsimasoq, tassanngaanniit nalunaaruteqarnerminni ilaatigut eqqaavaat.

Naatsorsuutit: Kinguartooqqaneq milliardimik nalilik

Mittarfinnut heliportinullu aserfallatsaaliuinermut aningaasanik maanna atorneqartartunit amerlanernik pisariaqartitsineq, Mittarfeqarfiit ukiumoortumik naatsorsuutaanni atuarneqarsinnaavoq. Mittarfeqarfiit aserfallatsaaliinissamut kinguartooqqanertik illuanut saatsinniaruniullu milliardit sinnerlugit atortariaqarlugit missiliuipput.

Suliffeqarfiup mittarfiit maannakkutut innissaat isumaginiaruniuk, mittarfiutimini nalikillisaanermisulli amerlatigisunik aningaasaliisariaqarpoq. 2018 nalikillisaanerit 46 millionit koruunit missaannik naleqarput, aningaasaliissutillu 19 millionit koruuniullutik.

- Taamaannera Mittarfeqarfinnut siunissamut qaninnerusumut ungasinnerusumullu unammillernartuuvoq, suliffeqarfik naatsorsuutimini allappoq.

KNR-ip Mittarfeqarfiit pisortaat, Henrik Estrup, oqaaseqartinniaraluarpaa, tamannali suli iluatsinnagu.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat