Partiip naalakkersuisoq allamik iliorsinnaasorinngikkaa: Tunuartariaqarpoq

- Ajoraluartumik killiffiuvoq. Ilumoortumik akisussaaffik tiguneqarluni, naalakkersuisoq minnerpaamik tunuartariaqarpoq.

Kukkunersiuinermut ataatsimiititaliap aalisarnermut naalakkersuisoqarfimmi ingerlatseriaaseq sakkortuumik isornartorsioreeraa, Partii Naleraq taama qisuariaateqarpoq.

AAMMA ATUARUK Ataatsimiititaliaq isornartorsiuivoq: Allat kinguneqartitsiumaarput

Kukkunersiuinermut ataatsimiititaliap isornartorsiuinera Deloittep aalisarnermut naalakkersuisoqarfimmit allaffissornikkut sulineq pillugu misissuinerata inernerinit tunngaveqarpoq.

Ataatsimiititaliap aalisarnermut naalakkersuisoqarfik aalisarnermut inatsimmi aalajangersakkanik arlalinnik pisortallu ingerlatseriaasiat pillugu inatsimmik malinnissimanngitsutut sakkortuumik isornartorsiorpaa.

Naalakkersuisoq akisussaaffeqarpoq

Kukkunersiunermullu ataatsimiititaliaq oqaaseqaatini naliliinerni sakkortussutsinit 1-mit 9-mukartuni 7-itut sakkortutigisumik isornartorsiuippat, taava naalakkersuisoq atuuffimminit tunuartariaqartoq, Jens Napaattooq isumaqarpoq.

- Innuttaasut qulaasuallugit assigiinngitsumik kiffartuunneqarnerat. Aamma allaffissornikkut piumasaqaatit qulaajaqqissaarlugit inissinneqartannginnerat, pappilissat pisariaqavissut qulaajaanissamut misissuinissamullu atortariaqartut pissarsiarineqarsinnaannginnerat.

- Imaannanngitsorujussuarmik demokratiip ingerlannerarneranut innarleerujussuarsinnaasoq taamatut ingerlatsisimaneq, akuerineqarsinnaanngilluinnartutut nalilerparput.

Jens Immanuelsenip tunuaqquneqarneranut tunngatillugu KNR-ip Kim Kielsen oqaaseqartinniarlugu sulissuteqarpoq. 

Nassuiaatissartaqanngitsumik itigartitsineq

Naalakkersuisoqarfiup assersuutigalugu aalisarnermi ingerlatseqatigiiffiit akuersissutinik qinnuteqaraangata akileraartussaanermut najugaqartussaatitaanermullu piumasaqaatinik naammassinninnersut piumasarineqartutut misissortannginneri ilaatigut isornartorsiorneqarpoq.

AAMMA ATUARUK Naalakkersuisup aalisarnermut naalakkersuisoqarfimmi sulinerluttoqanneqannginneraraa

Assersuutigalu tunisassiorfiup Halibut Greenlandip 2019-imi qinnuteqaatai nassuiaatissartaqanngitsumik itigartinneqarput. Tamanna Halibut Greenlandip pisortaata, Erik Sivertsenip KNR-imit oqaloqatigineqarluni uppernarsarpaa.

- Suna pillugu itigartitaasimanitta nassuiaatissartaqartinneqarnissaa kissaatiginaraluarpoq, taamaaliortoqanngilarli, taanna oqarpoq.