Naalakkersuisooqatigiinneq kingumut qiviarfigalugu
Partiip Siumup ukiorpassuarni aqutsisuunerata kingorna Kalaallit Nunaata innuttaasuisalu politikkikkut inissisimaneq nutaaq allaanerusorlu atulertussanngorpaat. Naalakkersuisunut ilaasortat nutaat politikkimillu allaanerusumik ingerlatsineq sungiunniarneqartussanngorpoq. Ingerlalluartoqarsimanersoq imaluunniit ingerlalluartoqarsimannginnersoq Inatsisartunut aappaagu qinersisoqalerpat qinersisartut politikerinut oqaluttuarisussaassavaat.
- Ukiut kingulliit sisamat kingumut eqqarsaatiginngitsuugassanngillat. Isumaqarluinnarpunga uagut akisussaaffeqarfitsinni ukiut sisamat ingerlanerini pingaarutilippassuarnik angusaqarsimalluta. Ilaatigut Nunatsinni efterskolit amerlanerit pilersinnissaat minnerunngitsumillu kalaallisuuliorfimmik pilersitsinissarput, taamaaliornikkullu kalaallisuut tamatsaaliorneqarnissaasa qulakkeernissaat angusimavarput. Suliat pingaarutillit ilagaat aamma nunatta radioani tv-anilu, KNR-imi, pissutsit qaammarsaavigineqarnissaat. Iliuusissatut pilersaarummik suliffeqarfiup ullumikkut ajornartorsiutaanik iluarsiiffiginissaanut pisariaqartumik suliaqarnissamut suliffeqarfimmi aningaasaqarnikkut suliatigullu pissutsit ersarissumik paasisaqarfiginissaat pingaaruteqarpoq. Suliat tamakku tamaasa inuiaqatigiinnut pingaaruteqarput, ilaqutariinnermut, kultureqarnermut, ilageeqarnermut naligiissitaanermullu naalakkersuisoq naqissusiivoq.
Mimi Karlsenip nunatta siulersorneqarneranut peqataasimanini nuannaarutigaa, pingaartumillu Nunatsinni innuttaasuinik attaveqaqateqartarsimanini nuannaarutigalugu.
-Ukiup ingerlanerani, ukiullu kingulliit sisamat ingerlanerini uatsinnut attaveqartarsimasut tamaasa qutsavigerusuppakka. Innuttaasut nutaanik isumassarsiaqarlutik suliatsinnullu oqaaseqaateqarlutik saaffiginnittartut qujamasuutigeqaakka. Toqqaannartumik attaveqaqatigiinneq innuttaasunillu oqaloqateqarneq nukissamik tunisisarpoq sulinermillu oqilisitsisarluni paasiuminarnerulersitsisarlunilu. Sunik tamanik oqinnerulersitsiniarlutik suliaqarsimasut suleqatigilluarsimanerannut aamma qutsavigerusuppakka. Sulinitta inuunerup oqinnerulersinnissaanut iluaqutaasimanissaa neriuutigaara, Mimi Karlsen ukiut kingulliit sisamat kingumut qiviarfiginerini naggasiivoq.
