Naalakkersuinermut tunngasunik oqaaseqartartoq: Siumup suut tamaasa annaavai
Nunatta karsiata inuttut namminermut tunngasunik atorneqarsimaneratigut, akileraartartut aningaasaataannik siornatigut atornerluisoqarsimanerata iliuuseqarfiginissaannik Siumup qineqqusaarutini malissimanngikkai Sten Lund isumaqarpoq.
- Siumup suut tamaasa annaavai. Naalakkersuinikkut nikittoqarsimanera aamma qinersisartut tatiginartunik ileqqorissaartunillu politikerinik kissaateqarmata, Siumumi siuttutoqqat paasisariaqarpaat. Aamma naalakkersuinikkut iligiikkuutaarneq piunnaarlugu silittumik suleqatigiittoqarnissaa, qinersisartut kissaatigaat, Sten Lund oqarpoq.
Naalakkersuisoqatigiit suleqatigiikkunnaarneranni, Siumup nammineq iluani avissaartuuttoqarnera aamma ersertoq taassuma oqaatigaa.
- Pisut ingerlanerat eqqumiiginarpoq, tamatumunngali patsisaasinnaalluni Siumumi isumaqatigiinngissutitoqqat qaffatsinneqarnerat. Immaqa Siumumi politikeritoqqat siunissaminnik annaassiniarusussimapput, Sten Lund oqarpoq.