Eqqartuussissuserisoqarfik uppernarsaasoq: Kielsen akuliuttussaanngissimanersoq misissoraa
Erseqqissassut: Naalagaafiup Eqqartuusisuserisua misissuisuussasoq, siusinnerusukkut allassimagaluarpoq. Kisianni misissuisussaq tassaavoq, Advokatfirmaet Poul Schmidth - suliffeqarfik taanna Naalagaaffiup eqqartuussissuserisuatut aamma atuuppoq.
Kim Kielsenip (S) umiatsiani aalisartumut apriilip naanerani atukkiukkamiuk tamatumalu saniatigut Naalakkersuisut siulittaasuatut nipisattassiissutinik qaffaaqataagami akuliussinnaanngitsuua?
Eqqartuussissuserisoqarfiup Poul Schmidthip tamanna naliliiffigileraa, eqqartuussissuserisut suliffeqarfia KNR-imut mailikkut paasissutissiivoq.
Suliaq assortuussutaasoq Kim Kielsenip nipisattassanik qaffaaqataanerata tamatumalu saniatigut umiatsiaminik aalisartumut, nipisanniartumut, attartortitsineranut tunngavoq. Suliaq politikkikkut ukkatarineqangaatsialerpoq.
Ingerlatsinernermut inatsimmut tunngasunut aamma pisortat ingerlatsinerannut inatsimmut immikkut ilisimasallit KNR-ip oqaloqatigisai qassiiusut Kielsen nipisattassat qaffannissaat pillugu atatsimeeqataasimassanngikkaluartoq isumaqarput.
AAMMA ATUARUK Immikkut ilisimasallit naliliipput: Nipisattassat amerlineqarmata Kielsen attuumassuteqarpallaarpoq
Naalakkersuisut siulittaasuat nammineq akuliusimavallaarnani isumaqarpoq.
Tusagassiorfik Sermitsiaq.ag naapertorlugu Kim Kielsenip Naalagaaffiup eqqartuussissuserisua suliamik misissueqquaa.
Tamanna Eqqartuussissuserisoqarfiup KNR-imut maanna uppernarsarpaa.
Suliaq illuatungeriinnit qassiiusunit misissuiffigineqartoq
Inuit Ataqatigiit Inatsisartuni gruppiata §37-mut apeqquteqaataannut Kim Kielsenip aalisartoq umiatsiaminik piffissami 2020-mi apriilip 27-annit maajip 19-annut attartortinnissaanik oqaatsitigut isumaqatigiissuteqarfigisimallugu uppernarsarpaa.
Kim Kielsenip oqarnera naapertorlugu umiatsiap attartortinnera aalisartut piniartullu kattuffiata tiimimut attartortitsisarnermut malittarisassaa malillugu naatsorsorneqarpoq.
Aalisartup umiatsiamut aningaasartuutit nalinginnaasut 25 procentianik akiliisussaq akissummi allassimavoq. Kim Kielsen umiatsiami attartortinneranit iluanaaruteqarsimannginnerarpoq ikiuineruinnarnerarlugulu.
Nipisannut pisassiissutit maajip ulluisa 13-ianni amerlineqarput, suliarlu Kielsenip umiatsiaminik aalisartumut attartortitsisimanera saqqummermat juunip aallartisimalernerani aallartinneqarluni.
Tamatuma kingunernatigut Kukkunersiuinermut Ataatsimiititaliaq Kim Kielsenip qanoq inissisimaneranik misissuilerlutik suliamut aamma ilannguppoq. Ataatsimiititalialli suliaqarnera isertuussaavoq, taamaammat Kim Kielsenimut tunngatillugu apeqqutit immikkuualuttortai pissarsiarineqarsinnaanatik.
AAMMA ATUARUK Kukkunersiuinermut ataatsimiititaliamit nipisannut suliaq pillugu apeqquteqartut
Eqqartuussissuserisoqarfiup suliamik naliliinini qaqugu naammassissangatinneraa KNR-imit suli uppernarsarneqanngilaq.
