Naalagaaffimmit tapiissutit pillugit kommunit isumaqatigiinngillat
Nunatsinni kommunit sisamaasut nammineerlutik aaqqiissutissamik nassaarsinnaassanngippata, taava Naalakkersuisut aaliangertariaqalissavaat naalagaaffimmiit tapiissutit kommuninut qanoq agguaanneqassanersut. Kommunilli sisamaasut nammineerlutik isumaqatigiinniarnerit iluminni ingerlateqqaassavaat.
-Kommunilli suleqatigiiffimminni ammasumik oqaloqatigiittareernermikkut isumalioqatigeereernermikkullu isummerpata ataatsimut aaqqiissutissamik saqqummiussisinnaanatik, taava pitsaanerusumik naligiissaarinissamut politikkikkut maanna iliuuseqartussat assortorneqarsinnaanngitsumik tassaapput Naalakkersuisut, nunami maani politikkikkut qitiusumik oqartussaasut. Naalakkersuisut tamanna suliassavigaat, ileqqorissaarnissakkuinnaanngitsoq aammali inatsisit atuuttut tunngavigalugit, taama KANUKOKA-p siulittaasua Martha Abelsen (S) isumaqarpoq.
Taamaattoq ataatsimoortumik tapiissutinut akit akissarsiallu qaffakkiartornerannut iluarsiissutissatut taamungaannaq allannguutitut procentiliunniagaq 2013-imi aningaasanut inatsisissatut siunnersuummut ilanngunneqareersimavoq, naak ataatsimoortumik tapiissutissat isumaqatigiinniutigineranni tunngaviusumik assortuussutigineqartutut suli naammassineqarsimanngikkaluartoq. Tamannalu kommunimi qullersanit nuannarineqanngilaq.
- Kommunit naatsorsuutigaat missingersuusiortarnikkut suleqatigiinnissamik nutaamik isumaqatigiissuteqarnissap tungaanut Namminersorlutik Oqartussat isumaqatigiissut maanna atuuttoq malissagaat. Tassamiuna kommunit pissuteqavillutik ukiut marlussuilli qaangiuttut 2013-imiit nutaamik naligiissaarisoqalernissaa kissaatigalugu saqqummiussimagaluaraat, taama Martha Abelsen oqarpoq.