Rosingip naalagaaffik tapiissuteqarnerutinniaraa
Michael Rosing naapertorlugu tamanna ajornarnavianngilaq danskimmi politikeriisa nunatsinnut ikiuukkusunnerat takusarpaa.
- Nunatsinni isuma maannamut imaassimavoq; naamik, taama ikiorneqarnianngilagut, nakimaanniarpallarpugut, meerartatsinnullu ikiugassaasutut takutikkusunngilagut, Suleqatigiissitsisunik pilersitsisoq, Michael Rosing KNR-imut oqarpoq.
Namminersorneq pillugu inatsit 2009-meersoq naapertorlugu naalagaaffimmit tapiissutit 3.4 milliardit koruunit missaanniipput, Danmarkimilu akitakissarsiallu ineriartornerinut naleqqussarneqartarlutik.
AAMMA ATUARUK Namminersulivinnissap oqallisigineqarnerata pingaarutillit ukkanneqanngitsoortippai
Naalagaaffeqatigiinneq nukittorsarneqassasoq
Taamaammat naalagaaffimmit tapiissutit qaffanneqassappata Namminersorneq pillugu inatsit allanngortinneqartariaqarpoq.
Michael Rosingilli nunatta, Danmarkip Savalimmiullu suleqatigiinnerannut nukittorsaataasumik naalagaaffeqatigiinneq tamarmi version 2,0-inngorlugu eqqarsaatigineqaqqittariaqarnerarpaa.
Michael Rosing naapertorlugu suleqatigiinneq Danmarkimut iluaqutissartaqangaatsiarpoq, nunarpummi Savalimmiullu ilaanngippata Danmark nunaminiaraannaavoq.
- Naalagaaffeqatigiikkuttali nukittuujuvugut, taamaammallu issittumi pissaaneqarluta, Danmarkillu taama iluaquteqarnera akeqarpoq, Michael Rosing oqarpoq.
Suleqatigiissitsisullu nalaagaaffimmit tapiissutit qaffaataat ilinniannermut, attaveqatigiinnermi atortulersuutilersornermut tavalu isumaginninneruppeqqinnissaqarfiullu pitsanngorsarnerannut atorneqassapput.
AAMMA ATUARUK Samarbejdsparti suli kinguaqqasoq
Folketingilli akuersissutigeqqaassagaa
Siunnersuuli Inatsisartussani amerlanerussuteqarfigineqassagaluarpat siunnersuut Folketingip akuersissutigeqqaagassaraa.
Michael Rosingilli Tillie Martinussen peqatigalugu Folketingimi ilaasortat arlaqartut attaveqarfigisimavaat taakkulu Suleqatigiissitsisut siunnersuutaat tigulluarsimavaat.
- Naalaaffimmit tapiissutit marloriaatinngortinneqaqqissaassanersut qanorluunniit iliuuseqavissanersugut naluara. Danmarkili assigiinngitsutigut ikiuukkusuttoq arlaleriarluta tusarparput, kalaallilli politikeriisa namimaanniarpallaarlutik tamanna naaggaartarpaat, Michael Rosing oqarpoq.
AAMMA ATUARUK Kalaallit Nunaanni naammaginanngitsumik ingerlatsisoqarpoq
