Naalagaaffiit Peqatigiit: Gassit silaannaap kianneruleriartuutigisai 2018-imi aatsaat taama angitigisut
Gassit silaannaap kianneruleriartuutigisai 2018-imi aatsaat taama angitigisut, Naalagaaffiit Peqatigiit nalunaarusiaanni allassimavoq.
Silarsuarmiut siunissami atukkatigut navianartorsiorataannaasut, nunani tamalaani silasiortut kattuffiata WMO-p Genèvemiittup nalunaarusiaani allassimavoq.
Gassit silaannaap kianneruleriartuutigisaata alliartuinnarnerisa ilutigisaannik kinguaariit tulliuttut silap pissusiata allanngoriartorneranik: kiatsikkiartuinnarneranik, silap pissusiata allanngorarujussuartarneranik, immap qaffakkiartuinnarneranik aammalu immami nunamilu uumassusillit ataqatigiiaarnerisa allanngoriartuinnarnerannik eqqugaarujussuarataannaasut, WMO-p oqaatigaa.
- Silap pissusiata allanngoriartorneranik kingunilimmik CO2-mik aniatitsineq 2018-imi 407.8 ppm-imiimmat CO2-mik ukiuni millionilikkaani aniatitsineq aatsaat taama angitigisoq, WMO-p oqaatigaa.
AAMMA ATUARUK Silap allanngorneriartornera issittumi uumasunut kinguneqarnerlussinnaasoq
- Gassinik silaannarmik kianneruleriartortitsisartunik aniatitsinerup annikilliartorpasinngitsoq - aammalumi taakku pillugit Parisimi isumaqatigiissummi naammassisassanik neriorsuuterpassuaqaraluartoq pisussaaffippassuaqaraluartorlu taakkuninnga aniatitsineq annikillisimanngitsoq, WMO-mi aqutsisup Petteri Taalasip oqaatigaa.
Gassinik silaannarmik kianneruleriartortitsisartunik aniatitsineq 2017-imi 405.5 ppm-iimiippoq. Nunarsuarmi tamarmi CO2-mik 2016-imi aniatitsineq agguaqatigiisillugu 403,3 ppm-imiippoq, massa ukiup siuliani 400,00 ppm-imiittoq.
Iliuuseqartoqartariaqarpoq
Gassinik silaannaap kianneruleriartortitsisartunik 2018-imi aniatitsineq 407.8 ppm-imut qaffappoq, tamannalu ukiuni qulini kingullerni aniatitsinerup agguaqatigiisillugu angissusaa qaffariaateqalaarsimaneranik ersersitsisuuvoq.
Gassinik silaannarmik kianneruleriartortitsinerpaasartunik tassa metanimik nitrogenoxidimillu aniatitsinerit 2018-imi aatsaat taama aamma angitigisut, nalunaarusiami erserpoq.
AAMMA ATUARUK DMI: Nuummi kiannerulluni panernerusoq
Parisimi isumaqatigiissummi anguniakkatut aalajangiussat piviusunngortinneqassappata erngertumik iliuuseqartoqartariaqartoq, Naalagaaffiit Peqatigiit aarlerisaarutigeqattaarnikuuaat.
Silaannaap 1,5 grader celsiusinik kiannerulernissaa pinngitsoortinniarutsigu CO2-mik aniatitsinerup alleriaqqinnissaa ingalanneqartariaqartoq, Naalagaaffiit Peqatigiit aarlerisaarutigaat.
Tassa imaappoq, gassit silaannarmik kianneruleriartortitsartut silaannarmut aniasut - soorlu naasunit teknikkimilluunniit atortoqarluni piiarneqartunit - anginerussanngillat.