DMI: Nuummi kiannerulluni panernerusoq
Qaammat ataaseq affarlu qaangiuppata juulliarassaaq, nunatsinnili illoqarfiit annersaanni suli aputeqanngilaq. Nittaallatuarneranit aputimerngit aareersimalerput.
- Kalaallit Nunaat ukioq manna kiarujussuarsimavoq. Apriilip qaammataanit novembari tikillugu ingasappoq, DMI-mi silasiortoq John Cappelen oqarpoq.
AAMMA ATUARUK ASSILIARTALERSUGAQ: Ukiup affaani siullermi ima kiatsigaaq
2019 aallartimmalli oktobarip qaammataa ilanngullugu agguaqatigiisillugu nalinginnaasumit gradenik marlunnik kianneruvoq. Februaarip qaammataa kiannerpaaffiuvoq, tassami nalinginnaasumit gradenik sisamanik kiannerummat.
Naliginnaasumit panernerusoq
Ukioq mannali sila kianneruinnanngilaq, panernerujussuuvormi. Ukiup aallartinnerani, tassa januaarip qaammataani nittaattarneranit pingasoriaammit nittaannerugaluartoq ukiup sinnera taamaanngilaq. Tassami sialuk, imaliliorneq nittaattarneralu nalinginnaasumit annikinneruvoq.
- Nunap ikuallarujussuarneranik aputeqarpiannginneranillu tamanna kinguneqarpoq.
Februaari: Naliginnaasoq: - 9,1 °C
Februar, ukioq manna: - 5,1 °C
Maaji: Naliginnaasoq: 0,8 °C
Maaji ukioq manna: 3,1 °C
Oktobari: Naliginnaasoq: -0,3 °C
Oktobari ukioq manna: 2,2 °C
Nakkaasut - nikinganerpaaffii:
Maaji: Naliginnaasoq: 56,5 millimeteri
Maaji ukioq manna: 1,9 millimeteri
Augusti: Naliginnaasoq: 89,1 millimeteri
Augusti ukioq manna: 17,3 millimeteri
Oktobari: Naliginnaasoq: 66,5 millimeteri
Oktobari ukioq manna: 31,2 millimeteri
Kilde: DMI
Maajip qaammataa nalinginnaasumit aamma panernerujussuuvoq. Nalinginnaasumimmi 56,5 millimeterinik annertutigisumik siallertaraluartoq ukioq manna 1,9 millimeteriinnarnik siallersimavoq.
Sialuk, imaliliorneq anorlertarneralu ukiakkut Nuummi nalinginnaasuugaluarpoq, ukioq mannali allarluinnaavoq. DMI-mmi kisitsisaataasa takutippaat, oktobarip qaammataa siornatigumut naleqqiullugu affaa ataallugu taamatut masannartuliorfiusoq.
AAMMA ATUARUK Video: Avannaani ulloq kiarujussuarfik kingulleq
Sunali pissutaanersoq oqaatigiuminaappoq.
- Silaannaap kissatsikkiartornera taamaattoqarneranut pisooqataavoq. Taannaannaanersorli oqaatigiuminaappoq, tassa silap nalinginnaasumik allanngorartarnera silaannaallu kissatsikkiartornera sila taamaanneranut pissutaavoq, DMI-mi silasiortoq John Cappelen oqarpoq.