Ukioq qaangiuttoq: Naalagaaffeqatigiinnerup sammineqarnera pisortat nuannaarutigaat
- Ukioq kusanartumik pitsaasumillu immikkooruteqarpoq.
Københavnimi Kalaallit Illuutaanni pisortaq, Leise Johnsen 2018 pillugu taama oqarpoq.
Taassuma Kalaallit Illuutaannilu pisortat allat ukioq qaangiutilersoq Kalaallit Nunaannut kalaallinullu Danmarkimi najugaqartunut pitsaasumik soqutiginnittoqarneranik misigisartik iluarisimaarluarpaat.
Københavnimi kalaallit illutaata meeqqat atuarfiini danskinut atuartunut Kalaallit Nunaat pillugu atuartitsisoqarnissaanik soqutiginnilluartoqarnera pingaartumik malugisinnaalluarpaa.
Atuartitsinermi piumaneqarluartoq
Kalaallit Illuata atuarfinnut kiffartuussisarnini septembarimi annertusivaa, qaammatillu sisamat ingerlaneranni atuartut 1000-init amerlanerusut atuarnerminnut atatillugu pulaarsimasut, Leise Johnsenip oqaatigaa.
AAMMA ATUARUK Danskit nunasiaateqarnerup nalaa pillugu ilisimasakippallaarput
- Atuaqatigiinnut Kalaallit Nunaat oqaluttuarissallugu siornatigut aalluppiarsimanatigu, maanna aallussinerulernerput nuannersupilorujussuuvoq, taanna oqarpoq.
Tusagassiorfiittaaq Kalaallit Nunaat pillugu sammisaqarnerulerput, ilaatigut DR-imit piviusunik tunngavilinnik nutaavinnik aallakaatitsisoqarluni.
Odense: kalaallinut noorlaanut atugassarititaasut pitsaanerusut
Danskit kommuniinit kalaallit Danmarkimi najugaqartut ikiortariaqartut aamma maluginiarneqarnerusut, Odensemi Kalaallit Illuutaanni pisortaq, Kirsten Mærsk isumaqarpoq.
Odensemi kalaallit illuata Vejlemi Odensemilu kommunit kalaallinut tikerlaanut tapersiinissamut suleqatigilerpai. Tamanna pissutigalugu kalaallit minnerpaamik quliniit aqqaneq-marlunnut amerlatigisut inuuniarnermikkut ajornartorsiuteqartut naatsorsuutigineqarsinnaasumit pitsaanerusumik Danmarkimi aallartilluartinneqarlutik, Kirsten Mærsk oqarpoq
AAMMA ATUARUK Aarhusimi kalaallinut ikiortarialinnut suliniut nutaaq
- Danmarkimiinnerminni aallaqqaataaniilli isiginiarneqanngikkunik kingusinnerusukkut takussaasupilussuanngussapput, Kirsten Mærsk oqarpoq.
Folketingip inuusuttut naalagaaffeqatigiinneq pillugu ilisimasaqarnerulernissaannut aningaasanut inatsimmi ukiunut sisamanut tulliuttunut 25 millionit koruunit immikkoortippai.
AAMMA ATUARUK Kalaallit Nunaat nutaaliaasoq Jyllandip avannaamiuinit ilisimasaqarfigineqarnerulissaaq
