Aarhusimi kalaallinut ikiortarialinnut suliniut nutaaq
Aarhus Stiftstidende taama allaaserisaqarpoq.
Suliniut naalagaaffimmi satspuljemit 5,6 millionit koruuninik tapiiffigineqarluni pilersinneqarpoq, innuttaasullu inooqataanikkut ajornartorsiutillit Nunatsinnit Danmarkimut nuunnerisa kinguninngua ikiorserneqarnissaat siunertaavoq. Aamma kalaallit Aarhusimi inuttaasut angerlarsimaffeqanngitsut namminneq initaarnissaannut ikiorneqassapput.
AAMMA ATUARUK Kalaallit inuuniarnermikkut ajornartorsiuteqartut naapittarfittaartut
Ikiorsiissuteqarnerlu ilaatigut innuttaasut kalaallisut oqaasillit ingerlalluartut tapersersortaatinnerisigut pissaaq, Aarhusimi Kalaallit illuutaanni pisortaq, Jørn Holbech, taama oqarpoq.
- Tapersersortissat taakku kalaallit kulturiat ilisimasaqarfigilluassavaat, Kalaallit Nunaanni sivisuumik najugaqarsimassallutik kiisalu Kalaallit Nunaannit Danmarkimut nuunnermi unammilligassaasinnaasut ilisimasaqarfigissallugit - aamma kalaallisut oqalussinnaappata iluaqutaalluassaaq. Kulturimik paasinnittaaseq pingaarutilipilussuaq oqaatsiniippoq, ilitsoqqussaralugillu oqaatsit atorneri toqqammavigissallugit toqqissisimanartuupput, pisortaq oqarpoq.
AAMMA ATUARUK Angutit inuusuttut Danmarkimi inissaqaratik danskisoorsinnaanatilluunniit nuuttartut
Kalaallit innuttaasut suliniuteqarfigineqarnerisa kingorna tapersersortigisaminniut atassuteqaannarsinnaanissaat eqqarsaataavoq. Tapersersortaasoq taamaalilluni tapersersukkami imminut pilersornissaanut inuunermillu pitsaasumik ingerlatsinissaata attatiinnarnissaanut kajumissaarnissaanulku peqataassaaq, Aarhusip Kommuniani isumaginninnermut rådmandi, Thomas Medom, Aarhus Stiftstidendemut taama oqarpoq.
Suliniut 2020-mi apriilip tungaanut ingerlanneqassaaq, aammalu Kofoeds Skole, Kirkens Korshær kiisalu Reden Aarhus suleqatigalugit ingerlanneqassalluni.
