Pisortaq: Kalaallit Nunaat nutaaliaasoq Jyllandip avannaamiuinit ilisimasaqarfigineqarnerulissaaq
Bo Albrechtsen Aalborgimi Kalaallit Illuutaanni pisortatut septembarip aallaqqaataani sulilerpoq.
Jyllandip avannaata nunarput ukiorpassuarni atassuteqarfigaa, ilaatigut Grønlandshavnen aqqutigalugu, aammalu Danmarkimi nunap immikkoortuini nunatsinneersunik najugaqarfigineqarnerpaalluni - 2017-imi katillugit 2.656-iullutik.
Aalborgimili Kalaallit Illuutaata ilisimaneqarnera killeqartoq Bo Albrechtsenip paasilertupallappaa.
- Sivikitsuinnarmik maani najugaqarpunga. imminullu ilisaritikkaangama oqarlunga Kalaallit Illuutaanni sulilersimallunga, taava inuit aperisinnaasarput: 'aap, taannaana soorpiaasoq?’
Nunatta nutaaliaasup oqaluttuarinissaa
Tamannali allanngortinniarneqartussanngorpoq. Bo Albrechtsen eskimologitut ilinniagaqarluni - kalaallisullu oqallorissuulluni - nunatsinni takornariartitsinerup kulturilerinerullu iluanni sulivoq, kingullermik Nuummi Nunatta Katersugaasiviani Allagaateqarfianilu.
AAMMA ATUARUK Eskimologi Aalborgimi pisortanngussasoq
Aalborgimili Kalaallit Illuutaat katersugaasivittut atorani allarluinnarnik suliaqarfiussasoq erseqqissaatigaa.
- Danmarkimi inuit oqaluttuunniarsarissanngilagut Kalaallit Nunaanni kikkut tamarmik qimussertartut. Kalaallit Nunaannimi pissutsit taamaassorigajuttarpaat. Inuiaat kalaallit ullumikkut nutaaliaasut sinniisuuffiginissaat ukiullu 40-t matuma siorna pissutsit sinniisuuffiginnginnissaat eqqumaffigilluartariaqarparput, pisortaq oqarpoq.
Taamaammat pisortap takorluugaraa aaqqissuussinerit nutaat - kalaallit illuutaanni avataanilu - tupaallatsitsillutillu nunatta ilisimaneqarneranik allanngortitsisinnaassasut.
Kalaallit Danmarkimut nooqqammersut paasilluarsinnaagai
Katersugaasiveqarnerullu iluani ukiuni arlalinni sulereerluni Bo Albrechtsenip inoqatinik ikiuerusussusia nutsuisutut ilivoq. Taamatuttaarlu Danmarkimut uterusunnera. Inuiaqatigiilli danskit uterfigalugit aamma inuunerup allaalluinnarneranik misigititsinera nassuerutigaa.
AAMMA ATUARUK Søren Stach Nielsen nunatsinnut angerlalersoq
- Ilungersunarpoq. Taamaalluinnarpoq. Pingaartumik Kalaallit Nunaanniinninni sunngiffinni sammisarisartakkama ilarpassui pinngortitami ingerlattarakkit. Taamaalillunga aallaqqaataaneeqqinniarsariaqarpunga, Bo Albrechtsen oqarpoq.
Taamatulli aqqusaagaqarnini nunatsinnit danmarkimut nooqqammersut allat paasinissaannut ikiornissaannullu atorsinnaassanasoraa.
- Assut iluaqutigissasoraara. Soorunami inuit sunik tunuliaqutaqarnersut ilisimaqqissaanngilara. Inuiaqatigiilli qanoq ittut qimanneraat qanoq ittunillu periarfissaqarnersut ilisimavara. Aamma ilarpassui suna pissutigalugu maanga nuunnersut paasipallassinnaavara.
AAMMA ATUARUK Kalaallit Illuutaat oqalutsinik ajornartorsiuteqartut
