Venstre: Naalagaaffeqatigiinneq ukkatarinerusariaqarparput
Aatsaat pigisaq alisissiartuleraangat qanoq naleqartigisoq paasinarsisarpoq.
USAp præsidentiata Trumpip sapaatip akunnerini kingullerni nunatsinnik soqutiginninnera pisortatigoortumillu Danmarkimut tikeraarnissaraluaminik taamaatitsinera pillugu taama oqarnissaq ussernartorsiornarpoq.
Naak Kalaallit Nunaat tuniniagaanngikkaluartoq oqaluuserineqarnerata danskit politikerit eqqarsalersippai, ilaatigut Venstremi.
AAMMA ATUARUK Trumpip tikeraarniarunnaarnera Kielsenip tusaatissatut tiguaa
- Naalagaaffeqatigiinnitta nuannaarutiginerani ilatsiinnarpallaarsimavugut. Tamanna Danmarkimut Kalaallillu Nunaannut atuuppoq, Venstrep politikkikkut oqaaseqartartua Jakob Ellemann-Jensen DR P1-imut oqarpoq.
- Taanna naleqarmat erliginerusariaqarparput. Nalinga aningaasanngortinneqarsinnaanngitsoq, kisianni uagutsinnut Danmarkimiittunut, Savalimmiunut aamma Kalaallit Nunaannut nalilik.
Jakob Ellemann-Jensenip nassuerutigaa danskit tungaanniit Issittoq sianigilluarneqarsimanngitsoq, uffa nunat pissaanilissuit USA, Rusland aamma Kina ukiorpaalussuarni Issittumi suliniarnerminnik annertusaasimagaluartut.
AAMMA ATUARUK Trumpip tikeraarniarunnaarnerani Danmark sukataarnerusariaqarpoq
- Imaassinnaavoq Issittup soqutiginarnera aatsaat paasileripput. Tassami ajutuujusarnermi uani akuersaassagutta una arlaatigut ajunngitsortaavoq: Naalagaaffeqatigiinnitta naleqartinnissaanut pikkorippallaarsimanatalu pitsaavallaarsimanngilagut, oqarpoq.
Nalakkersuisutut danskillu naalakkersuisuisut Jakob Ellemann-Jensen isumaqarpoq Kalaallit Nunaata tuniniarnissaa “oqaluuserineqartariaqanngitsorluunniit”.
AAMMA ATUARUK Aki-Matilda Høegh-Dam: Præsident Trump nunatsinnut tikilluaqqusaavoq
- Nunap inuiaallu tuniniarneqarnissaat oqaluuserineqartariaqanngilarluunniit. Misililluguli eqqarsaatigigaanni: taavami qanoq? USAmi naalagaaffinngussava? Taava Indiaaqqat imaluunniit Puerto Rico sianerfigineqarsinnaapput aperalugillu qanoq isumaqarnersut. Pikkuginaviarunanngilaat, Jakob Ellemann-Jensen DR-imut oqarpoq.
