PITUFFIK Naalaakkersuisut nalunaarusiortitsinerat akisooq
Pituffimmut suliaq pillugu kukkusoqarsimaneralu pillugu paasussutissat nalunaarusiarineqarnera, 1,7 millioner koruuninik akeqarpoq.
Taama paasitinneqarpoq Inuit Ataqatigiit siulittaasuat, Sara Olsvig paragraf 37 naapertorlugu suliaq pillugu Naalakkersuisut siulittaasuat, Kim Kielsen apeqquteqarfigereeraalu.
Nalunaarusiaq 200-nik qupperneqartoq 1.694.799 koruuninik akeqarpoq. Tamannalu juulip arfineq aappaannili Naalakkersuisunit atuarneqareerluni. Tassa taamaakkaluartoq innuttaasut tamassuminnga paasisaqarusuttut suli utaqqilaaqqaartariaqassapput.
Nalunaarusiap tamanut saqqummiunneqannginneranut pissutaasutut taaneqarput, aasaq manna kunngikkormiunik tikeraartoqarneq aamma nalunaarusiap tiguneqareernerata kingorna tamassumunnga attuumassuteqartunut tusarniaasoqarnera. Aamma nalunaarusiap kalaallisuunngortinneqarnerata suli naammassineqannginnera paasissutissiissutigineqarluni.
Nalunaarusiap annertunerpaartaa inuiaqatigiinnut tamanut nalunaarutigineqartussaassasoq, Naalakkersuisut siulittaasuata Kim Kielsenip erseqqissaatigaattaaq aamma oqarluni inatsisitigut nalilersorneqareernerani paasinarsiumaartoq suut inuiaqatigiinnut paasissutissiissutigineqartussaassanersut suullu isertuunneqassanersut.
