Naak sikusimanngikkaluartoq Siku Cross Ice Marathon piareersarneqaleruttorpoq
Siku Cross Ice Marathon, 42,195 kilometerisut ungasissusilimmut arpatitsinissamik aaqqissuussaq, maannamut peqataarusuttunit 58-init nalunaarfigineqarsimavoq. Tamanna siornatigut Uummannami sikukkut ingerlanneqartarsimasoq sikunngitsoornera pissutigalugu ukioq manna allaanerusumik ingerlanneqassaaq.
Arpatsitsinissaq tasersuarmi pisinnaanngippat, arpatsitsineq aqqusinerni ingerlanneqassasoq, aaqqissuisut ilaata, Anguteeraq Grønvoldip oqaatigaa.
- Ulluni kingullerni ulapittorujussuuvugut, ullumikkut aqagulu suli ulapippugut – siulersuisut, aaqqissuisut kiisalu ikiuuttut tamatta. Sikunngitsoornerata kingorna allanik periarfissarsiortariaqarnikuugatta. Arpatsitsinissamut suli ulapippugut, oqarpoq.
42,195 kilometerisut ungasissusilimmut arpatsitsinissamut saniatigut halvmarathon 21,1 kilometerisut ungasissusilik aamma ingerlanneqassaaq. Anguteeraq Grønvoldip nuannaarutigaa, ukioq manna arpatsitsinissamut peqataarusuttut katillutik 58-iummata.
Aatsaat taamak soqutigineqartigaaq
Anguteeraq Grønvoldip oqarnera malillugu arpatitsinissamut soqutiginninneq aatsaat taamak annertutigaaq. Maannamut angutit 27-t arnallu 31-t peqataarusullutik nalunaarsimapput, nalunaarfissarlu marsip 15-ianut killeqarsimavoq.
- Aallartikkatta angorusuttarnikuusarput avataaninngaanniit peqataasoqarnissaq iluatsilluarpoq, tassa massakkut takusinnaasatsitut nunat 12-13 assigiinngitsut peqataassapput, ilai Japaniminngaanniit ilat Luxemburgi, ilai Italia, tamanna assut nuannerpoq, taanna oqarpoq.
Arpatsitsisarnerullu soqutigineqaleraluttuinnarnera nittarsaassilluartarnerannit peqquteqartoq taassuma ilanngullugu oqaatigaa.
- Ukiumiit ukiumut soqutigineqaleraluttuinnarnera, assut malunnarpoq. Nittarsaassilluarusuttarpugut assut, ukioq naapajaarlugu nittarsaassiniarsareqattaartarpugut Facebookikkut Instagramikkut soorlu aamma assersuutigisinnaavara Visit Greenlandikkut, taavalu nittartakkat allat aqqutigalugit apuunniarsarisarpagut tamakkua, taavalu kusanartumik takutitsiniarsarisarluta, isumaqarpunga taakku peqqutaanerpaasut kusanartumik takutitsinerit, Anguteeraq Grønvold naggasiivoq.
Siku Cross Ice Marathon arfininngorpat Uummannami ingerlanneqassaaq, arpattussallu ullaakkut qulinut aallassapput, unnukkullu timersortarfimmi eqqissisimasumik unnussiuaartoqassalluni.
