Naak naatitat?

Naatitarsiniarluni pisiniarfiliaraanni maluginiagassat ilagaat pisiniarfiit naatitaateqarpianngitsut.

- Ullumi, ippassaq weekendinilu naatitanik amigaateqalerpugut. Naatitat tikittoorutissagut arfininngormalli tikittussaagaluarput, Jes Nyborg Brugsenimi agguaasartoq oqarpoq.

Nunaqarfinni naatitaqannginnera takornartaaneq ajorpoq, Nuummili takornartaavoq.

Brugsenili kisimi naatitanik maqaasisaqanngilaq. Pisiffiliaraannilu naatitanik takussaasoqanngingajappoq.
Naatitaateqannginnermullu suna peqqutaanersoq Pisiffimmi sulisut nassuiaarusunngillat.

Europalli kujataatungaani silarlunnera pisiniarfinnut eqquinerluppoq, minnerunngitsumillu naatitartorusuttunut.

- Ilumoorpoq Spaniami silarlussimasoq, tassani salatinik pisisarpugut. Tamanna januaarip naalernerani februaarillu aallartinnerani malugaarput, Jes Nyborg oqaluttuarpoq.

Pisiffik naatitanik nunguutsisimammat pisiniat Brugsenimut naatitarsiniartalersimapput, tamatumalu kingorna aamma Brugseni nunguutsilerluni.

- Unammillertigut suuteqanngippata, pisiniat uagutsinnukartarput pisinerusarlutillu.

Naatitartorusuttullu nuannaarutissaqalerput. 

- Banaanit akunnerup ataatsip matuma siorna tikittoorutigaagut, aamma naatsorsuutigaara ullumi tikittooqqissasugut, aqagulu ullaakkut sinneri tikissapput. Taava aqagu ullaakkut pisiassanut ilisiviit ulikkaaqqassajunnarsipput, naatitat grøntsagillu, Jes Nyborg naggasiivoq.