Naajap kissaatai: Pineqaatissiineq sakkortunerusoq sulinermullu atukkat pitsaanerusut
Pineqaatissiisarneq sukannernerusoq sulinermilu atukkat pitsaanersut inatsisit atuutsinneqarnerannut naalakkersuisup Naaja Nathanielsenip danskit justitsministeriata ataatsimeeqatiginerani kissaataasa ilagaat.
Taassuma danskit justitsministeriat Nick Hækkerup (S) inatsiseqarnermut tunngasut pillugit sisamanngormat ataatsimeeqatiginerani kissaatitut annguppai.
Pineqaatissinneqarsimasunut inissiisarfinni sulisut amerlaneruleqqullugit suliniutit amerlineqarnissaat kissaatigaa.
Naalakkersuisoq tusagassiutinut taama nalunaaruteqarpoq.
Pineqaatisseeriaaseq ukiunik arfinilinnit sivisunerusoq
Assersuutigalugu sakkortuunik pinerluuteqarsimasunut pinerluttulerinermi inatsimmi ukiuni qulini pineqaatissiisarneq ukiunut 16-inut sivitsorneqassasoq Naaja H. Nathanielsenip kissaatigaa.
- Inatsisilerinermut tunngasut danskit oqartussaaffigigaluaraat, ineriartornerup Kalaallit Nunaannit ilusilersorneqarnissaa Naalakkersuisut pingaartippaat. Danskit naalakkersuisuilu oqaloqatigiinnerput nuannaarutigaarput, Naaja Nathanielsen oqarpoq.
AAMMA ATUARUK Danskit aningaasanut inatsisissaat kalaallisut radiomut meeqqanullu illunut aningaasaliinertaqartoq
Nunatsinni inatsiseqarnerup Danmark assigalugu ineriartortuarnissaa pingaaruteqartoq ilanngullugu erseqqissarpaa.
Kangaatsiaq politeeqarfittaassanngitsoq
Kangaatsiami politeeqarfeqalernissaa suli pilersaarutigineqanngitsoq Nick Hækkerupip ataatsimiinnerminni paasissutissiissutigaa. Tassami Kommunefogedeqaannassasoq qallunaat naalakkersuisuisa aalajangiusimavaat.
Naalakkersuisut inatsisilerinermik sulinerminni tulleriiaarinermik nutaamik suliaqarlutik tusagassiuutinut nalunaarummi ilanngullugu eqqaavaat:
- Naalakkersuisut tulleriiaarinermut nutaamik allattuiffiliuleruttorput, taannalu ukiumi nutaami tamanut saqqummiunneqarumaartoq suliniutinik suliassaqarfinnillu ukkatarineqartussanik nutaanik, assersuutigalugu digitalikkut pinerluuteqartarnerit pillugit imaqarumaarpoq.00:00:14
Naaja H. Nathanielsenip inatsisit atuutsinneqarnerannut naalakkersuisuunermi saniatigut aningaasaqarnermut, aatsitassanut naligiissitaanermullu naalakkersuisoqarfiit akisussaaffigai.
