Danskit aningaasanut inatsisissaat kalaallisut radiomut meeqqanullu illunut aningaasaliinertaqartoq
Danmarkip aappaagumut aningaasanut inatsisissaa ataasinngornermi inissinneqarpoq. Kalaallit Nunaanni kalaallinullu Danmarkimiittunut suliniutinut aningaasaliissutit uatsinnut soqutiginarnerpaapput.
Kalaallit Folketingiimut ilaasortaatitaasa marluk aningaasanut inatsimmik isumaqatigiinniarnermit pissarsiarisatik ilorrisimaarutigaat.
Siumumeersup Aki-Matilda Høegh-Damip Danmarkimi nunatsinnilu angerlarsimaffeqanngitsunut aningaasaliissuteqartoqarnera erseqqissaatigineruaa:
- Danmarkimi kommunit immikkut qinnuteqarsinnaasaramik inuusuttut ikiorniarlugit, taakkunani aamma piumasaqarsimavugut isumaginninnermut ministerimut kalaallit aamma ilanngunneqassasut immikkullu aningaasaliiffigineqarlutik.
- Taava aamma immikkut nunatsinni angerlarsimaffeqanngittut ikiorniarlugit Kofoed-skole aamma aningaasaliiffigaarput. Tassani inuusuttut kisiartaallutik isigineqanngillat.
Tamatuma saniatigut Danmarkimi kalaallisut oqaatsigut atorlugit radioqalernissaanut aningaasaliisoqarpoq.
- Taava kissaatigalugu kalaallisut oqaatsigut atorlugit tusarnaalluta malinnaasinnaanissarput naak danmarkimiikkaluarluta, danmarkimimi 17.000-t kalaallit missaaniikkamik ilinniartorpassuullutillu, arlallit aamma amigaatigisaramikkut kalaallit akornanni danmarkimi susoqarnersoq malinnaasinnaaneq, tamanna pillugu pilersitsiserusussimavugut kalaallisoortumik radioqalernissaa.
Danskit nunatsinnut tikerlaat internet atorlugu kalaallisut ilinniartitsisarnissamut 2 millionit koruuninik immikkoortitsinissaq ilaatigut aamma isumaqatigiissutigineqarpoq.
Nunatsinni meeqqanut illut
Inuit Ataqatigeersup folketingimi ilaasortap, Aaja Chemnitz Larsenip meeqqanut illunik amerlanersunik pilersitsinissat aamma imminut toqussimasumut qanigisaasunut saaffissamik pilersitsisoqarnissaa nuannaarutigaa:
- Suliniutitsinnut, nunatsinni kalaallinullu Danmarkimiittunut iluaqutissat, assigiinngitsunut isumaqatiginninniarnikkut katillugit 27,2 miillionit koruunit anguagut. Nunarput sulinitsinni pingaarnerpatipparput, tassalu 17 millionit missaanniittut Tasiilami, Ilulissani Maniitsumilu meeqqat illuannik pilersitsinissamut atorneqassallutik.
- Illut meeqqat ilaqutaasullu ikiortissarsiornermik saaffiginniffissaannik ataatsimik peqalernissaa siunertaavoq. Taakkunani meeqqat misissorneqarsinaallutik ikiorneqarsinaallutillu, toqqissisimanartumiillutillu videokkut immiunneqarlutik politiinit apersorneqarsinnaallutik.
Oqarasuaatikkut attavimmik aamma pilersitsisoqassaaq:
- Suliaq uannut piingaaruteqartuuvoq, sulilu anguniagarput tamakkivinngilarput, taamaammat pingaarnersiuinitsinni salliutissimavarput. Taassuma saniatigut imminut toqussimasumut qanigisaasut qimagaasut oqarasuaatikkut saaffiginniffiginnillutik siunnersortiffissaanik nutaamik pilersitsinissamut suliniutitsinni angusatta ilagaat.
