Naaja: Sulisartut pisinnaatitaaffii inissittariaqarpagut
Naaja Nathanielsenip, IA tunuliaqutaralugu qinigassanngortittup politikerit piffissaagallartillugu susassaqarfimmut tunngatillugu iliuuseqanngippata suliniutinut angisuunut atatillugu sulisoqarnermi annertuumik unamminartoqalernissaa ilimagaa.
-Suliatigut peqatigiiffiit assigiinngitsut kattutsinnissaat politikerit suliassarinngilaat, tamanna nammineq aalajangigassaraat. Piviusorli tassaavoq suliatigut peqatigiiffiit ilaasortakitsut suliatigut peqatigiiffinnut anginerusunut naleqqiullugit isumaqatigiinniarfiginissaat ajornarnerummat. Taamaammat isumaqarpunga susassaqarfik taanna pissusissamisoortumik naleqqussarfiujumaartoq. Tamatumanilu sulisut sulisitsisullu aaqqiissutissatut siunnersuuteqartariaqarput. Susassaqarfimmi allanit misissortikkutsigu naggataatigut illuatungeriinnut tamanut ilaqutaajumaarpoq, Naaja Nathanielsen knr.gl-imut oqarpoq.
Allamiut amerlanerusut nunatsinnut suliartorlutik tikikkattalerpata, nunani avannarlerni suliatigut peqatigiiffeqarnikkut kulturitta ukiorpassuarni iluaqutigalugu atorsimasatta assinganik pigisaqarnissaat qulakkeersinnaanngilarput. Taamaammat susassaqarfik ersarissunik malittarisassiuunneqartariaqarpoq.
-Uuliasiornermi aatsitassarsiornermilu suliniutit, maanna piareersarneqartut tamaasa iluatsinneqassappata sulisut tamarmiusut 50 %-inik amerlisoorutigeratarsinnaavagut, taakkunanngalu amerlanerussuteqarluartut kalaaliunatillu danskiunaviaratik. Tamakku takkussuutinnginnerini susassaqarfik malittarisassiuuttariaqarparput. Suliffeqarfinnut isumaqatigiissutitsinnut ilanngussinnaavagut? Sulisartut peqatigiiffimmut aalajangersimasumut ilanngunnissaannik piumasaqaateqarsinnaavugut? Isumaqatigiissutinut susassaqarfimmut aalajangersaaffiusunut tunngatillugu ajornartorsiulersinnaavugut? Tamakku sukkanerpaamik inissittariaqarpagut, taamaaliunngikkuttami piffissaq ungasinngitsoq qaangiuppat annertuupilussuarnik unammigassaqalersinnaavugut, Naaja Nathanielsen oqarpoq.
Sulisoqarneq pillugu immikkut sammisaqarnerminut atatillugu Naaja Nathanielsen inatsisartunngortut aallartikkunik isummerfigisariaqagaanniksisamanik apeqquteqarpoq.
1) Namminersorlutik Oqartussat siunissami ikinnerpaamik akissaatitigut isumaqatigiissutit assigiinngitsut 50-it isumaqatigiinniutiginissaannut piffissamik atuissappat, imaluunniit pisariillisaasoqarsinnaava?
2) Piginnaaneqarfiit assigiinngitsut amerlanerusut akuerinissaannut suliatigullu killiliussat ajornanngippat piiarnissaat qanoq ililluta qulakkeersinnaavarput?
3) Kalaallit Nunaanni suliatigut peqatigiiffiit siunissami nukittuumik inissisimaannarnissaat qulakkeerniarlugu qanoq iliussaagut?
4) Qanoq ililluta peqatigiilluta sulisartut suliffeqarfiillu nutaat nunatsinni sulisoqarnermut akuulersinniassavagut, isumaqatigiissuteqartarnerput kimeerutsinngitsoorniassagutsigu?
