Myanmarimi tigusat 6500-it - tusagassiortullu Reutersimeersut - iperagaasut
Præsident, Win Myint marlunngornermi taama nalunaaruteqartoq Reuters allaaserisaqarpoq.
Tusagassiortut marluk Wa Lone aamma Kyaw Soe Oo Myanmarimi 2016-imi decembarip qaammataani tigusarineqarput, taakkua naalagaaffiup isertugaataannik unioqqutitsisimasutut ukiuni arfineq marlunni parnaarussassanngortinneqaraluarput, isornartorsiuisulli isumaqarput musliimit ikinnerussuteqartut sakkutuunit malersorneqaranerat pillugu ilanngutassiisarsimanertik parnaarussaassutigigaat.
Myanmarimi eqqartuussiviup qullersaata tusagassiortunit suliassanngortitsineq apriilimi itigartitsissutigaa, tamatumalu malitsigisaanik tusagassiortut aniguinissaat qularineqalerpoq.
Myanmarimili apriilip 17-ani ukiortaarsiorneq aallartippoq, præsidentillu ukiortaarsiornermut atatillugu saammaassineratigut tigusarpassuit aniguisussanngortut, AP taama allaaserisaqarpoq.
