Myanmarimi sakkutuut akerliussutsimik takutitsisunut sioorasaarisut

Myanmarimi sakkutuunut nunami tassani naalakkersuisunut uppisitsisunut illuatungiliuttut nuna tamakkerlugu suliumajunnaartoqarnissaanik kajumissaaripput. Sakkutuut tassunga atatillugu akerliussutsimik takutitsisunut maanna sioorasaarilerput.

Suliniaqatigiiffiit Myanmarimi nuna tamakkerlugu suliumajunnaartoqarnissaanut kajumissaarisut arlaliupput. Sakkutuunut illuatungiliuttut taakkununnga ilaapput.

AAMMA ATUARUK Myanmarimi parnaarussat 23.000-t sakkutuunit iperagaasut

Myanmarimi sakkutuut naalagaaffiup tv-qarfiatigut sapaammi mianersoqqussuteqarput, akerliussutsimik takutitsisoqarnerani toqutaasoqarsinnaanissaa mianersoqqussutigineqarluni.

Myanmarimi sakkutuut naalakkersuisunik februaarip aallaqqaataani uppisitsisut akerliuffiginiarlugit akerliussutsimik takutitsisarnerit sakkortusiartorsimapput, inuillu marluk sapaatit-akunnerata naanerani aallaaneqarlutik toqutaallutik.

Myanmarip naalakkersuinikkut siuttua Aung San Suu Kyi tassani uppisinneqarpoq.