Myanmarimi parnaarussat 23.000-t sakkutuunit iperagaasut
Myanmarimi parnaarussat 23.000-nit ikinnerunngitsut Myanmarimi naalakkersuisunik uppisitsisunit isumakkeerfigineqarput iperagaallutillu.
Sakkutuut naalagaat Min Aung Hlaing, sakkutuut naalakkersuisunik uppisitsisunut siuttuusoq, Myanmarimi naalagaaffiup tv-qarfiatigut taama nalunaarpoq.
Parnaarussat 23.314-it nunaniillu allaneersut 55-it iperagaasut nalunaarutigineqarpoq.
Myanmarimi sakkutuut Facebookikkut saqqummiussisinnaassusiat killilersorneqarumaartoq, Facebook nalunaarpoq. Sakkutuummi paasissutissanik eqqunngitsunik saqqummersitsisartut oqaatigineqarpoq.
AAMMA ATUARUK Myanmarip politiivi eqqissiviilliortoqarnerani eqqarlutillu tusagassiortumik tigusarinnittut
Buddhisti ingasaassiniaq musliminullu sakkortuumik oqaaseqartartutut ilisimaneqartoq Wirathu, Hla Sawilu sakkutuut partiianni USDP-mi nuimanerit ilaat iperagaasunut ilaapput. Nutaarsiassaqartitsivik Myanmar Now taama nalunaarpoq.
Sakkutuut Myanmarimi Aung San Suu Kyip naalakkersuisuinik uppisitsisut akerliuffigalugit akerliussutsimik takutsinerpassuit kingorna parnaarussarpassuit iperagaapput.
Eqqissisimasumik akerliussutsimik takutitsisoqarpoq, sakkutuulli isumannaallisaaniat imermik tissaluttaatit, gassi qulliliornartoq aqerlussallu gummiusut atorlugit akerliussutsimik takutitsisut avissaartinniarsaraat.