Myanmarip politiivi eqqissiviilliortoqarnerani eqqarlutillu tusagassiortumik tigusarinnittut
Innuttaasut akerliussutsimik takutitsisut arlaqartut politiinit tigusarineqarput, politiillu arlaleriarlutik silaannarmut eqqarsimasut. Pisunut takunnissimasoq nutaarsiassaqartitsivimmut Reutersimut taama oqaluttuarpoq.
Akerliussutsimik takutitsisut nunap sakkutuuinit qunusaarneqaraluarlutik, Myanmarimi illoqarfiit annersaanni, Yangonimi katersuussimapput. Akerliussutsimik takutitsisut sakkortuumik saassunneqarsinnaanerat sakkutuut ataasinngornermi aarlerisaarutigaat.
AAMMA ATUARUK Myanmarimi naalakkersuisunik uppisitsisut eqqissiviilliornerni imermik tissaluttaatersortut
Myanmarimi sakkutuut naalakkersuisunik februaarip aallaqqaataani uppisitsimmata, generalimit Min Aung Hlaingimit aqunneqarput. Inuillu ataatsimuulissagaluarpata peqqarnisaarniaratik taakku nalunaaruteqaraluarput.
Illoqarfiit pingaarnersaanni akerliussutsimik takutitsisoqarnerani, politiit eqqarsimasut, isiginnittoq oqaluttuarpoq.
Akerliussutsimik takutitsisoqarneranut atatillugu illoqarfiit annersaata tulliani, Madalayimi aamma inuit 27 tigusarineqarput, taakku ilagaat tusagassiortoq. Isiginnittut ilaat tusagassiuutillu taama nalunaaruteqartut reuters paasissutissiivoq.
Nunat tamalaat akornanni nakkutilliisut Myanmarimilu qinersinermik ataatsimiititaliarsuata qinersinermi peqquserluttuliortoqarsimasutut sakkutuut oqariartuuteqarnerat akerlilerpaat.