Mútep inuusuit qutsavigigai: Maligassiuisutut isigaassi

- Sassarnissassinnut sapiissuseqarsimavusi. Maligassiuisutut isigaassi.

Múte B. Egedep ”Qamani”-mik taallugu periusissiaq erinitsaassaasimasoq Ilulissani kulturip illorsuani Sermermiuni marlunngornermi saqqummiukkamiuk ilaatigut taama oqarpoq. Periusissiaq taanna nunatsinni imminut toqunnissamik pinaveersaartitsisuussaaq.    

Periusissiaq nunatsinni politikerinut siorna septembarip aallartinnerani saqqummiunneqarpoq.

Tamanna nunarsuaq tamakkerlugu imminut toqunnissamut pinaveersaartitsinermut septembarip qulingani ulloqartitsinermi pivoq.

Ilaatigut MIO periusissiornermik arriippallaarneraalluni inuusuttunillu peqataatitsisoqannginneraalluni isornartorsiuingaatsiareersorlu periusissiaq septembarimi saqqummiunneqarpoq.

Imminut toqunnissamik pinaveersaartitsiniarluni inuusuttut MIO-lu suleqatigiillutik taamani innersuussuteqareeraluarput.

- Inuusuttut 40-nik innersuussuteqarput. Ajoraluartumillu oqartariaqarpunga inuusuttut tusaaneqarsimanngillat, meeqqat oqaaseqartartuat MIO-meersoq Aviâja Egede Lynge naalakkersuisut periusissiaat siulleq pillugu KNR-imut siorna maajimi oqarpoq.

Inuusuttut tusaaneqartut

Naalakkersuisulli siulittaasuat Múte B. Egede periusissiamik innuttaasunut marlunngornermi unnukkut saqqummiussigami allarluinnarmik oqaaseqarpoq.

- Periusissiami inuusuttut misilittagaat pisariaqartitaallu qitiutinneqarsimapput. Inuusuttut innersuussutaat tusarnaaqqissaarsimavagut.

- Inuusuttut sapiissuseqarlutik ajornarnerpaat qajannarnerpaallu pillugit oqaluttuarsimapput. Paquminartut paquminarunnaarsillugit. Inuusuttut oqariartuutaat periusissiamik annertuumik pisariaqartumillu pilersitseqataammata qujaffigerusuppakka, Múte B. Egede tusagassiuutinut nalunaarummi oqarpoq.

Periusissiartaaq 2028-p tungaanut atuutissaaq.