Múte B. Egedep Kalaallit namminneq aalajangiisussaasut Trumpip immikkut aallartitaanut nassuiarniarpaa

Kalaallit Nunaata nunanut allanut tunngasunut naalakkersuisua, Múte B. Egede (IA), USA-p Kalaallit Nunaannut immikkut aallartitaa Jeff Landry aamma USA-p Danmarkimi aallartitaa Ken Howery ataasinngornermi ataatsimeeqatigissavai.

Múte B. Egedep Amerikamiut ersarissuliorfigissallugit, Facebookikkut nalunaarutigaa.

- Nunatta siunissaa uatsinnit nunatsinni kisimi aalajangerneqartussaasoq ersarissuliorfigissavakka, taanna oqarpoq.

-Pingaartikkigattaaq maanna suleqatigiissitaq pilersissimasarput akunnitsinni ataqqeqatigiissumik, nunat tamalaat akornanni inatsisit tunngavigalugit nunarpullu avaqqunnagu ingerlalluartariaqartoq, Múte B. Egede Facebookikkut allappoq. 

Naalakkersuisut siulittaasuata Jens-Frederik Nielsenip Jeff Landry Louisianami guvernøriusoq ataasinngornermi ataatsimeeqatiginiarlugu, TV 2-mut sapaammi uppernarsarpaa.

Taakkua ullup qanoq ilinerani ataatsimiissanersut suli nalunaarutigineqanngilaq.

Landry Nuummut sapaatikkut ualikkut  tikippoq. USA-p aallartitaa Howery ataasinngornermi tikissasutut naatsorsuutigineqartoq, tusagassiorfik Sermitsiaq allappoq.

Landry Kalaallit Nunaannut immikkut aallartitatut decembarimi, atuuffiusumut nutaamut,  toqqarneqarpoq.

Tamanna Donald Trump USA-p Kalaallit Nunaat ilaatigut isumannaallisaanermik tunngavilersorluni tiguartariaqarneranik, arlaleriarluni oqaaseqareersoq pivoq.

/ritzau/