USA Muslimit millionilikkaat Kinami koncentrationslejrimiitsinneqarput

Muslimit ikinnerussuteqartut Uighurit, muslimillu allat koncentrationslejrinut inissinneqartarnerat, USA-p illersornissaqarfiata Pentagonip nalunaarusiaani eqqartorneqarpoq.

Muslimit 3 millionit pallillugit koncentrationslejrinut inissinneqarsimasinnaanissaat, Pentagonip ilimagaa. Kinami muslimit 10 millionit missaanniipput.

Koncentrationslejrinut siornatigut inissinneqarsimasut oqaluttuaraat naalliutsitsisoqartartoq, parnaarussiviit ulikkaarluinnaqqasut, peqqarniitsumillu pissusilersorfigineqartarlutik. Muslimit ilaat tamanna pillugu imminut toqussimasut ilaatigut aamma oqaluttuaraat.

Koncentrationslejrit kapinartunik ungerutissiaqarput, paarsisoqarlutillu. Kinap musliminut taama pissusilersornera kinguneqartariaqartoq, USA-p nunanut allanut tunngasunut ministeriata Mike Pompeop oqaatigaa, Kinallu akerlianik oqaatigaa iliuuseriniakkat akiniarneqarumaartut.

Kinap immikkoortuani Xinjiangimi atorfilittat immikkut sukannersumillu iliuuseqarfigineqarnissaat USA-p eqqarsaatersuutigaa. Muslimit ikinnerussuteqartut Uighurit amerlanersaat, muslimillu allat Xinjiangimi najugaqarput, taakkuuppullu koncentrationslejrini ilaatigut inissinneqarsimasut.

    /ritzau/Reuters