VIDEO MSC-mik nalunaaqutsikkat piumaneqarneruleriartuinnartut
Massakkullu kalaallit raajartaat MSC-mik taamaallaat ilisarnaasersorneqarsimapput. Aalisakkalli allat akuerisaanissaat MSC-meersup pisariaqarsoraa.
Aalisakkat qaleruallillu piujuaannartitsinissamik tunngaveqarluni pisarineqarsimasut atuisartut amerliartuinnartut piumanerusaraat, ilisarnaallu tungujortoq (MSC) pisisartunit isiginiarneqarnerusalerpoq.
Nioqqutissat MSC-mik nalunaaqutsikkat piumaneqarusarput
Aalisakkap piujuaannartitsinissamik tunngaveqarluni pisarineqarneranik ilisarnaat takussutissiivoq, taamaammat pisisartup imaluunniit pisiniarfiup qulakkeersinnaavaa aalisakkat tuniniarneqartut nungusaataanngitsumik aalisarineqarsimaneri.
Nunatsinni aalisakkat qaleruallillu piujuaannartitsinissamik tunngaveqarluni aalisarneqarsimasutut uppernarsaammik MSC-mik ilisarnaateqartannginneri pissutigalugu piumaneqarnerat killeqarsinnaasartoq Sulisitsisunit qularineqanngilaq:
AAMMA ATUARUK Danmarkimi sushimik neriniartarfissuaq kinguppannik nunatsinneersuinnarnik sassaalliisalissaaq
- Pisisartut amerlasuut kalaallit nioqqutissaataat pisiarinngitsoortarpaat MSC-mik nalunaaqutserneqarsimannginneri pissutigalugu. Nunarsuarmilu pisisartut tamatuminnga pingaartitsisut nioqqutissanik Kalaallit Nunaanneersunik pisiumanngippata, suliffeqarfinnit avammut nioqquteqartartunit tamanna akisunaarneqassaaq, Sulisitsisut peqatigiiffianni GA-mi pisortaq, Brian Buus Pedersen, KNR-imut taama oqarpoq.
MSC-mik nalunaaqutsersuisarneq pillugu Qanoruumi ilanngutassiaq qulaani isiginnaarsinnaavat.