Danmarkimi sushimik neriniartarfissuaq kinguppannik nunatsinneersuinnarnik sassaalliisalissaaq

Danmarkimi neriniartarfiit nuannarineqaqisut Stick`n`sushi-mik taaguutillit, Danmarkimi neriartarfinni siullersaallutik MSC-mik ilisarnaateqalissapput. Taamaalillutik sapinngisartik naapertorlugu aalisakkanik nungusaataanngitsumik aalisarneqartunik taamaallaat tuniniaasassallutik. Nittartakkami foodculture.dk-mi tamanna allaaserineqarpoq.
Allattoq Elisa Isaksen
septembarip 02-at 2014 10:41

Tamanna kalaallit kinguppaataannut MSC-mik siornali ilisarnaasersorneqalersunut iluaqutaassaaq.
 
Kalallit kinguppaataat nuna tamakkerlugu sushinik neriniartarfinni taakkunani siunissami aalajangersimasumik tuniniagaassapput, pisisartuisami taamaalillutik nungusaataanngitsumik pisanik nerinissartik qulakkeersinnaassammassuk.
 
- MSC-mik ilisarnaasersuineq atuisutsinnut toqqissisimanarlunilu isertuussaqannginnitsinnik oqaluttuartuuvoq, Jakob Gaard neriniartarfinni pineqartuni pitsaassutsimut pisortaq oqarpoq.

Neriniartarfimmili aalisakkat tamarmik MSC-mik ilisarnaateqassanngillat.
 
- Uiluiit kalaallillu kinguppaataat MSC-mik ilisarnaasigaassapput. Taakkua saniatigut tun-inik nungusaataanngitsumik pisanik pissarsiniarsarivugut, nunarsuarmili tunfiskinik aalisarnermi MSC-mik ilisarnaasikkanik pissarsiniarneq ajornakusooqisoq Jakob Gaardip oqaatigaa.
 
Neriniartarfiup aalisakkat MSC-mik ilisarnaatillit pissarsiarisinnaanngikkaangamigit, aalisakkat aalisapilunneqannginnerat nungutaanissamullu aarlerinartorsiortinneqannginnerat neriniartarfiup allatut iliorluni uppernarsarniartassavaa.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq