WWF: MSC-mit akuersissuteqalerneq aalisarnermut angusaavoq angisooq
- Kitaani avataasiorluni qaleralinniarnerup MSC-mit akuerineqarnissaata ukiuni arlalinni suliniutigineqarluni maanna anguneqarnera, kalaallit aalisartuinut angusaavoq angisooq pingaartorlu.
Pinngortitaq pillugu nunarsuaq tamakkerlugu suliniaqatigiiffiup WWF-ip Nuummi immikkoortortaqarfiani sulisoq, Kaare Winther Hansen, taama oqarpoq.
AAMMA ATUARUK MSC-mik meqqillit pisiariumaneqarnerussapput
- Silarsuarmi qaleralinniarnerit annersaat MSC-mik meqqilerneqarpoq, WWF-imiillu Sustainable Fisheries Greenland aamma kalaallit aalisartut pilluaqquagut, WWF tusagassiorfinnut nalunaaruteqarluni taama allappoq.
MSC-milli akuersissummik tunniussisoqaraluartoq aamma pitsanngorsagassaqartoq, WWF taama isumaqarpoq.
- Kalaallit Nunaanni inatsisiliorneq pitsaanerusariaqarpoq, aalisarnerup sumiiffinnut sunnertiasunut akornutaannginnissaanik qulakkeerisussamik aammalu sumiiffinni ullumikkut killilersugaanngitsumik qaleralinniarfiusuni pisassiissutinik aalajangersaaviusumik, Kaare Winther Hansen erseqqissaavoq nangillunilu:
- MSC-mit akuerineqarnikkut Kalaallit Nunaat tassaalerpoq nunarsuaq tamakkerlugu aalisarnerup piujuaannartitsinissamik tunngaveqarluni ingerlanneqarnissaanut maligassiueqataasussaq.
MSC-mit akuerineqarnerup peqatigisaanik nunatsinni avataasiorluni qaleralinniarneq WWF-ip aalisakkanut allattorsimaffianut "qorsummut" ilanngunneqarpoq.
Aalisakkanullu allattorsimaffik taanna nunani arlalinni atuisartut suliffeqarfiillu sakkussatut atugaraat, Kaare Winther Hansen taama naggasiivoq.