Motzfeldtip partiit avoqqaarai: Partiit tapiissutit naalakkersuinermik sulinermut atussagaat naatsorsuutigaarput
Partiinut tapiissutit politikkikkut sulinermut atorneqarnissaat naatsorsuutigilluinnarini Inatsisartut Siulittaasoqarfiata ersarissumik nalunaruutigaa.
Inatsisartut siulittaasuat Vivian Motzfeldt (Siumut) tusagassiuutinut nalunaaruteqarluni taama erseqqissaavoq.
Innuttaasut partiinut tapiissutit politikkikkut sulinermut atorneqarnerannik qularuteqaqqunagit partiinut tapiissutit siunertaat malillugit atorneqarnissaat inassutigilluinnaritsik, taanna erseqqissaavoq.
Suleqatigiissitsisut aningaasaqarnerat
Suleqatigiissitsisut aningaasaataasa amerlanerpaartaat Inatsisartut tunngaviusumik ilaasortaatitaqarnermullu tapiissutaanneerput.
Partiimut Suleqatigiissitsisunut ukiumut 1,1 millionit koruunit missaat tapiissutaasarput.
Suleqatigiissitsisut ilaasortaat 2.725 koruuninik siorna akiliuteqarput.
Tusarfik: Suleqatigiissitsisut 2019-imut ukiumoortumik nalunaarusiaat
- Partiit sulinerminnut sapinngisamik iluaqutaasumik atornissaannut namminneq soqutiginnittuunermikkut atornerluinissaq pinaveersimatissagaat partiinut tapiissuteqartarnermi tunngaviusumik aallaaviuvoq, Vivian Motzfeldt allappoq.
Partiit tapiissutisiaminnik qanoq atuinerat innuttaasunit qassiiliutigineqannginnissaat partiit namminneq akisussaafigigaat, taanna isumaqarpoq.
Suleqatigiissitsisut partiinullu tapiissutit
Suleqatigiissitsisut tapiissutisiaminnik atuinerisa oqallisigineqarnerujussuata ilutigisaanik partiit avooqqarineqarput.
AAMMA ATUARUK Nuunneq, sapigaqarneq uippakajaarnermullu ikiorneqarneq: Suleqatigiisitsisut uku avissaartuussutigaat
Suleqatigiissitsisut siulittaasorigallagaat Tillie Martinussen siulersuisuunerilu parteeqatiminnit sapaatit akunnerini kingullerni assuarineqarput.
Suleqatigiissitsiut 2019-imi 2020-milu aningaasartuutigisimasaasa ilaat
Nuunneq: 14.214 kr.
Nuummi Laserklinikkimi suliaritinneq: 3.654 kr.
Oqarasuaammik angallattakkamut immiineq: 25.500 kr.
Uippakajaanermi ikiorserneqarneq: 50.762,50 kr.
Tamalaat: 5860,20 kr.
Katillutik: 99.990,70 kr.
Partiip Kommuneqarfik Sermersuumi immikkoortortaqarfiata siulersuisui partiillu naatsorsuuserisorisimasaa Jan Joe Seidsen isornartorsiuisuupput. Jan Joe Seidsen akerliulluni partiip siulersuisuunerinit tunuarpoq.
Aningaasat akileraartartut akiligaat Tillie Martinussenip nammineq aningaasartuutissaraluaminut atorsimagai, taakku isumaqarput (paasissutissat talerpiatungaaniittut takukkit).
Tillie Martinussenip tamanna ilumuunngiinerarpaa, partiillu siulersuisuunerisa taperserpaat.
Suliaq ilungersunartutut isigalugu malinnaavigigaat
Tamannalu partiinut tapiissutinik atuineq pillugu suliaq Inatsisartut Siulittaasoqarfiannut anngunneqarneranik kinguneqarpoq.
Suleqatigiissitsisut pillugit suliaq, Vivian Motzfeldtip tusagassiuutinut nalunaarumminni immikkut oqaaseqarfiginngilaa.
AAMMA ATUARUK Tillie Martinussenip atornerluinerarneqarnini saassussinerlunnertut nalileraa
Siulittaasoqarfiulli suliaq ilungersunartutut isigalugu malinnaavigigaa, taanna allappoq.
Partiit naatsorsuutaat kukkunersiukkat tapiissutillu politikkikkut sulinermut atorneqarsimanerannut uppernarsaatit siulittaasoqarfimmut ukiut tamaasa anngunneqartartut, taanna ilisimatitsivoq.
- Partiit ataasiakkaat aningaasartuutinut maleruagassiorsimanissaat aningaasatigulluunniit killiliisimanissaat naatsorsuutigisariaqarpoq. Partiillu taamaalillutik maleruagassat killiliussallu taamaattut malinneqarnissaat namminneq aamma aalajangigassarissavaat, Vivian Motzfeldt allappoq.
Siulersuisuunerit suliani ataasiakkaani aningaasartuutit partiip sulineranut attuumassuteqarnersut naliliisartut, Suleqatigiissitsisut siulersuisuini ilaasortaq Kim Lyberth siusinnerusukkut oqarpoq.
Inatsisartut Siulittaasoqarfiat Inatsisartuni sulinermut malittarisassanik inatsisinillu 2019-imi februaarip qaammataani misissuisitsilerpoq. Partiinut tapiissuteqarnermut inatsit misissuisitsinermi aamma ilanngunneqarpoq.