Motorcykkilit nunatsinni qatimaattaleqqissapput
Motorcykkilinik eqqusseqqusiunnaarneq atorunnaartussanngorunarpoq Atassut, Inuit Ataqatigiit aamma Demokraatit tapersersugaannik
Siunnersuut Atassutip inatsisartuni ilaasortaatitaasa Knud Kristiansenip aamma Siverth K. Heilmannip ukiaanerani katersornermi saqqummiuppaat. Siunnersuut inatsiseqarnermut ataatsimiititaliami suliarineqarmat amerlanerussuteqartut taperserpaat. Taamaasilluni aqqusinermi angallatit taakku nipilersinnaasartut nunatsinni takussaaleqqittussanngorunarput.
Siumukkormiulli siunnersuut akerleraat itigartinneqarnissaalu siunnersuutigalugu. Siumukkut isumaqarput aqqusinermi angallanneq ulorianarnerulissasoq. Siumukkut aamma siunnersuut sumik siunertaqarnersoq takujuminaatsippaat motorcykkilit inuussutissarsiornermi atorneqanngimmata.
Kisianni tassa amerlanerussuteqartut Inuit Ataqatigiit Demokraatillu Atassutikkut siunnersuutaat taperserpaat. Motorcykkilit nunatsinnut eqquteqqusaannginnerat 1980-mili atuuppoq ajutoornerit sakkortuut arlallit pereersut.
