Motorcykkilit apuutinngilaattaa uppisitaapput
![](/sites/default/files/styles/image_934x467/public/article_images/scooter630_0.jpg?itok=BLB9-I-v)
Motorcykkilit ammaanneqangajakkaluarlutik Inatsisartuni uppisitaapput. Inuit Ataqatigiit aamma Demokraatit amerlanerussuteqarlutik siunnersuut Atassutikkut saqqummiussaat tapersersoraluarpaat.
Inuit Ataqatigiilli Inatsisartuni gruppeat ataatsimiiinnermini isumaqatigiissinnaasimanngilaq.
- Inuit Ataqatigiinni isumaqatigiippugut nammineq inuttut isummernerput tunngavigalugu taasiniarluta, Inuit Ataqatigiit oqaaseqartuat Aqqaluaq Biilmann Egede taasinissaq sioqqutilaarlugu oqarpoq.
Inuit Ataqatigiinneersut tallimat akerliupput sisamat tapersersuisut, Inatsisartuni taasinerit nalunaarsorneqarnerat taama takussutissiivoq.
Inatsisartuni katillugit 14-it siunnersuummut akerliupput arfineq marluk isumaqataasut. Taamaasilluni paasinarsivoq nunatsinni aqqusinerni motorcykkilit takussaaqqilissanngikkallartut.