Kalaallit Nunaanni Politiit: Motoorit angivallaartut imigassallu atornagit
Aasariartulerpoq taamaalineranilu angallatit aqqarneqarput. Aallanginnermi sillimaniarnermut pisariaqartinneqartut qulakkeeqqarneqarnissaat politiinit kaammaatttuutigineqarpoq.
Johan Westen Sermersuup politeqarfiani politikommisærip oqarnera naapertorlugu angalanermi sillimaniarnermut pikkorinnerulersimavugut ajunnginerusinnaasorli taannaa isumaqarpoq.
- Pikkorissiartorpugut, kisianni suli ilikkagassaqaqaagut, angalalinnginnermi sillimaffigisassat pikkorinneruffigisinnaavagut suli, Johan Westen oqarpoq, - takujuartarparput inuit eqqarsalluaqqaarnatik aallariasaartartut, sumiiffimmi aamma piffimmi aalajangeriasaariarlutik aallartartut taakkua misinnartarput politiinut suliakkersuutaasartut allanullu, Sermersuup politeqarfiani politikommisær Johan Westen oqarpoq.
Kalaallit Nunaanni polititi siorna 2017-mi imaani 47-nik ujaasipput annaassiniarlutillu. 2018-ip ukiuata affaani siullermi politiit imaani ujaasinernik annaassiniarnernillu 23-nik suliaqarput taakkununnga ilaapput angutit inuusuttut marluk Maniitsup Kangaamillu akornani ajunaartut sulianut ilaallutik.
AAMMA ATUARUK Inuit marluk Maniitsup eqqaani ajunaartut
Johan Westenip oqarnera naapertorlugu ajunaanerpassuit ujaasinerillu pinngitsoortinneqarsinaapput sillimaniarnermut atortut aallartinnani isumagisimagaanni.
- Politiininit innersuussutigerusunnaqaaq sillimaffigisassat qulakkeeqqaarlugit avalattoqartarnissaaq, Westen oqarpoq.
AAMMA ATUARUK Inuit sisamat Qeqertarsuup Tunuani ajunaarsimassangatinneqartut
Piareersaqqaarani aallartarnerit pinngitsoortinneqarnissaat politiinit kaammattuutigineqarpoq.
Angallataatillit ilaqarput angivallaarujussuartunik aquuteralalinnik taakkua ajutoornissamut qanittuaraapput. Johan Westen oqarpoq.
- Umiatsiaaqqap motooria angallammut innersuussutigineqartoq qaangernaveersaaruk ! - massakkut motoorit angisoorujussuit 3 imaluunniit 400 HK angullugit angallateeraararsuarnut ikkunneqartalernikuupput, angallatit taama mikitigisut sakkortoorujussuarmik motoorillit sukkasoorujussuarmik ingerlasut arlaannut apuitakkallunik, ajortorujussuarmik kinguneqarsinnaavoq, Johan Westen oqarpoq.
Politiit sinerissamit saaffigineqartarput aalakoorlutik aallartunik nalunaarutiginnittunik
- Imigassamik atuinnginnissaq taanna pingaartorujussuuvoq, aasaarnerani politiit kalerrinneqallattaasaramik, imaluunniit ukioq naallugu, ima oqarlutik: unagooq imigassartorsimagunarluni uanngaanniit allarpoq, kalerriutigineqartorlu sumut ingerlaarnersoq imaluunniit qanoq aalakoortiginersoq nalilersinnaanngilarput, Sermersooq Politeqarfiani politikommisær Johan Westen taama oqarpoq
Attaveqaqatigiittarfimmi Facebookimi politiit qupperneranni imaani sillimaniarnermut siunnersuutit atuarneqarsinnaapput
