Inuit marluk Maniitsup eqqaani ajunaartut
Nutartigaq: 12:17.
Umiatsiaaraq inunnik marlunnik ilaasulik Maniitsumiit Kangaamiut tungaanut ingerlaartoq immakkiartortoq politiit arfininngormat nalunaaqutaq unnukkut arfineq-pingasunut qiteqquttoq nalunaarfigineqarput.
- Aasiaat radioanit juunip 23-ani nalunaaqutaq arfineq-pingasut qeqqanut kalerrinneqarpugut, Maniitsumi Politiinit Niels Tønnesen taama paasissutissiivoq.
Politiit angallataat Sisak 2 Maniitsup talittarfiani tulannganerata nalaani kalerriisoqarpoq, angallallu erngertumik Maniitsup avannaaniittumut Tunomut umiitsiaaqqap kalerriutigineqarfianut aallarsimasoq Niels Tønnesenip oqaluttuaraa.
Politiit angallataaniittoq umiatsiaq pullattagaq sukkanerumaartoq sumiiffimmut siuarpoq. Issittumi Sakkutooqarfik aamma kalerrinneqarpoq, qulimiguulillu S-61 aamma kalerrisaariffiup sumiiffianut aallarluni.
Angumerinngilaat
Ikiortariallilli angumerineqanngillat:
- Inuk toqungasoq ullaassakkut nalunaaqutaq pingasunut tanneq arfineq-marluk qaangilaaraa umiatsiamit pullattakkamik nassaarineqarpoq. Aappaalu ullaassakkut tallimanut tanneq qulinngortoq aamma toqungasoq nassaarineqarpoq, Niels Tønnesen oqarpoq.
Angutit inuusuttut marluk pineqarput, taakkulu Maniitsup napparsimmavianukaanneqarput toqungasutullu nalunaarutigineqarlutik. Ilaqutaasut kalerrinneqareerput.
Ajunaartoqarnera pillugu Niels Tønnesen annerusumik maanna oqaaseqarsinnaanngikkallarnerarpoq, Aasiaat radioanullu ajunaalernermik nalunaarfigineqartunut innersuussilluni.
Aaqqitaq: Angutit inuusuttut marluk Kangaamiunut ingerlaarnerarlugit allaaserineqaqqaaraluarpoq. Politiilli taakku sumut ingerlaarneri paasissutissaatiginngikkaat paasitinneqarpugut.
