Mittarfiup sumiinnissaa assortuussutigineqarpoq

Taanna isumaqarpoq, Qaqortumi mittarfiliortoqassagaluarpat sananera akikissagagaluarluni, 1199 meterimiit tallineqarnissaa siunissami eqqarsaatigineqalissagaluarpat tamanna akisoorujussuussasoq.

- 1199 meterimik takissusilimmik mittarfiliortoqarnissaa kommunalbestyrelsemi ilaasortat amerlanerussuteqartut ukiarmi akuersissutimmassuk, kingusinnerusukkut tallineqarnissaa eqqarsaataavoq, Kalistat Lund tikkuaavoq, maannali allamik ajornartorsiuteqalerlutik isumaqarpoq.

- Naalakkersuisup siunnersuutaata kingunerisassai pillugit  Kujataani innuttaasunut paasissutissiisoqartariaqarpoq, siunnersuutimmi kingunerissammagu Islandimut Danmarkimullumi toqqaannartumik timmisartuussisarnerit siunissami atorsinnaajunnaarnissaat, Kommune Kujallermi Angallannermut ataatsimiititaliap siulittaasua, Kalistat Lund, naggasiivoq.

Qaqortumi inuussutissarsiutit pillugit ataatsimiititaliami siulittaasoq Jim Riis isumaqarpoq Kaliista Lundip oqaasii tunngavissaqanngitsut. Isumaqarlunilu qujarunneqartariaqartoq Qaqortumi mittarfiliortoqassammat.

- Atlantiku qulaallugu timmisartunut mittarfik ukiup ilarujussuani matoqqasarpoq, taamaattumik  nunap ilaanut angalaniarneq ajornakusoorsinnaasarluni. Maannakkut mittarfittaarnissatsinnut periarfissinneqarpugut. Taanna inussutissarsiutit siuarsarneqarnerinut iluaqutaassaaq, takornariallu maannakkut ikiligaluttuinartut amerleqqinnissaannut periarfissiissaaq. Kaliistat Lund sinnerluta saqqummiussaqanngilaq, nammineerluni isummani saqqummiumagu, Jim Riis oqarpoq.

Kommune Kujallermi borgmesterip Simon Simonsenip angallannermut ataatsimiititaliap siulittaasua aamma isumaqatiginngilaa.

- Erseqqissaassutigisariaqarpara mittarfiup sumiinnissaanik Inatsisartut maannamut suli aalajangiinngimmata. Tamannalu aallaavigalugu isumaqarpunga Kommune Kujallermi Kommunalbestyrelse sinnerlugulusooq oqariartortoqarsinnaangitsoq mittarfiliornissamut Kommune Kujalleq qujaannartoq, taamaatoqanngilarmi, Simon Simonsen oqarpoq.