Aningaasanut inatsisissaq nutaaq: Mittarfissat maanna ilanngullugit
Nutarternera: Namminersorlutik Oqartusat KNR-imut ilisimatitsipput, aningaasanut inatsisissatut siunersuummi allannguutit mittarfiliorntiternissanut tunngasut missingersuutinut allannguuisanngitsut. TAssalu aningaasanut inatsisissatut siunnersuut 19,6 millionit koruuninik 2019 -imi aamma 17,7 millionit koruununik piffissami 2019-2022 sinneqartoorfiussaaq.
Aningaasaqarnermut naalakkersuisup, Pele Brobergip aningaasanut inatsisissatut siunnersuunni siulleq ataasinngormat saqqummiuppaa, Inatsisartullu aningaasaqarnermut akileraartarnermullu ataatsimiititaliaat taanna najoqqutaralugu sapaatit akunnerata annersaa missingersuutit pillugit isumasioqatigiipput.
Isumasioqatigiinnerli naammassiinnartoq ilaasortat siunnersuummik nutaamik KNR-ip paasisai naapertorlugit tunineqarput.
Siunnersuummi tassani, tallimanngornermi saqqummiunneqassasumi, Ilulissani, Nuummi Qaqortumilu mittarfiliortiternissat aningaasanut inatsisissatut siunnersuutip oqaasertaliussartaani ilaassapput.
Mittarfinnik sanaartornissaq, aningaasalersuinissaq ingerlatsinissarlu pillugit siunnersuut upernaaq immikkut ittumik ataatsimiinnermi saqqummiunneqarlunilu Inatsisartunit suliarineqarmat, Nunatsinni attaveqatigiinnermut atugassamik suliniutit annersaat pillugu oqaasertaliussat, aningaasanut inatsisissatut siunnersuummi siullermi allaqqavoq.
AAMMA ATUARUK Aningaasanut inatsisissatut siunnersuut sinneqartooruteqarfiusussaq
Mittarfiit takissusissaat politikkikkut nalornissutaasut
Oqaasertaliussat pineqartut tassaapput, Inatsisartut aningaasanut inatsimmik siorna suliaqarnerminni akuerisaat. Oqaasertaliussat Naalakkersuisut suliniummik ingerlatseqqinnissaannik pisinnaatitsipput.
Oqaasertaliusssat taakkua KNR-ip paaasisai naapertorlugit 2019-imut aningaasanut inatsisissatut siunnersuummut maanna ilanngunneqarput.
Naalakkersuisoqataasorli Partii Naleraq mittarfiit takissusissaannik upernaaq immikkut ittumik ataatsimiinnermi nalornilersitsivoq, Kalaallit Airports mittarfiliortussanik suliariumannittussarsiornerminik unitsitsineranik kinguneqartumik. Piginneqatigiiffiup aamma suliniummut aningaasaliisussarsiornini politikkikkut nalorninartorsiorneq pissutigalugu unitsippaa.
Mittarfiliortiternissat pillugit oqaasertaliussat ilanngunneqarnerat aningaasanut inatsisissatut siunnersuummut tamakkiisumut qanoq isumaqassanersoq erseqqinngilaq.
Mittarfiliortiternissaq pillugu inatsisissap suliarinerata, aningaasanut inatsisissatut siunnersuummi aningaasatigut toqqammaviit allanngortissinnaagai, aningaasanut inatsisissatut siunnersuummi saqqummiunneqareersumi allaqqavoq.
AAMMA ATUARUK Mittarfinnut isumaqatigiinnginnerup naalakkersuisoqatigiit uppisissinnaavaa
