Mittarfimmi qaartartumeerinissamik sioorasaarisoqartoq: Politiit arnaq tigummigallagassanngorlugu tigusarigaat
Nalunaaqutaq tallimanut tanneq arfineq pingasut nutarterneqarpoq.
Politiit biilii sisamat Nuummi mittarfiliartinneqaqqammerluinnarput.
Kalaallit Nunaanni Politiit Nuummi mittarfimmi qaartartumeerisoqarnissaanik sioorasaaruteqartoqarsimaneranik nalunaarummik tigusaqarnertik pissutigalugu mittarfiliartitsipput.
Tamanna sillimasut pisortaata Aqqalu Petersenip KNR-imut uppernarsarpaa.
- Nuummi mittarfimmi qaartartumeerinissamik sioorasaarisoqartoq, nalunaarummik tigusaqarpugut, tamannalu maanna misissuiffigaarput.
Mittarfimmi inuit qimagussortinneqartut, Kalaallit Nunaanni Politiit ilisimatitsipput.
Massakkumuugallartoq pisumut tunngatillugu oqaaseqarnerusinnaannginnerarput.
Qaartartumeerinissamilli sioorasaarisoqartillugu politiit qanoq suleriuseqartarnerlutik, sillimasut pisortaata oqaatigaa.
- Nalunaarummik tigusaqaraanni taava mittarfimmi inuit qimagussortinneqartarput sioorasaarisoq tigusarineqartarpoq pisumilu misissuisoqalertarluni, Aqqalu Petersen oqarpoq.
Arnaq tigummigallarneqartoq
Nuummi mittarfimmi qaartartoqanngimmat tallimanut tanneq arfineq pingasunngulersoq assersuiunnaartut sillimasut pisortaat oqarpoq.
Arnaq 50-it missaanni ukiulik tigummigallagassanngortinneqartoq, ilisimatitsissutigaa.
- Mittarfimmi sulisunit nalunaaruteqartoqarpoq. Taamaammat suliaq misissuiffigaarput, Aqqalu Petersen oqarpoq.
Arnaq eqqartuussivimmi sassartinneqassanersoq politiit maanna paasinialeruttorpaat.
