VIDEO Mittarfiit pillugit suliniutit piiaaviillu Randip piareersimaffigai
Randi Vestergaard Evaldsen qaffakkiartupallassimavoq. Politikerip 31-nik ukiullip Demokraatit Inatsisartuni ilaasortaatitaata sisamaasut siorna ilagilerpai.
Aningaasaqarnermut aatsitassanullu naalakkersuisup Anda Uldumip napparsimalluni suliffinngeqartussanngornera novembarip aappaani tusarliunneqarpoq. Tamanna aningaasanut inatsisissaq pillugu isumaqatigiinniartoqaleruttortoq pivoq naalakkersuisullu nikinnerini Randi Vestergaard Evaldsen inuussutissarsiornermut, suliffeqarnermut niuernermullu naalakkersuisunngorpoq, Vittus Qujaukitsullu Uldumip akisussaaffeqarfii akisussaaffigilerpai.
Qaammatit pingasut qaanngiummata, februaarip aappaani, Demokraatit aningaasaqarnermut aatsitassaqarnermullu naalakkersuisoqarfik akisussaaffigileqqippaat, akisussaaffik Randi Vestergaard Evaldsenimut tunniunneqarluni.
- Piareersimavunga, tassa piareersimanngitsuuguma akisussaaffik aamma tigusimanavianngikkaluarpara.
- Tassa Piareeqqasutut misigivunga nalunagulu tunuliaquttakka, ilaquttakka naalakkersuisooqatigiillu aamma suleqatiginissaannut piareerpunga taannalu sillimaffigivara, Randi Vestergaard Evaldsen KNR-imut oqarpoq.
Kim Kielsenimit nersualaarneqangaatsiarpoq
Naalakkersuisut siulittaasuannit Kim Kielsenimit (S) aamma tapersersorneqarluarpoq.
- Malinnaavoq aamma pimoorussilluni tunniusimavoq. Taanna ilisarnaatigivaa. Aamma isumaqatigiinniartarluni naapigiaasarneranut tunngatillugu aamma piareersimalluni, Kim Kielsenip oqaatigaa.
Suliassarlu Randi Vestergaard Evaldsenimut piareeqqavoq.
- Siullermik suliarisassat tassa suliniutit nutaat pulaternissaq, aammalu ilitsersorneqarnissaq. Taassuma saniatigut aamma mittarfinnut tunngasut massakkut ingerlasut ingerlateqqqinneqassapput, naalakkersuisoq oqarpoq.
Mittarfiit pingaarnersiuinermi salliutinneqartut ilagissavaat
- Ulapputissat ilarivaat aningaasaliinissamut tunngasortai – pisortat namminersortullu peqatigiinnerinut tunngasut aammalu avataanit aningaasaliisussat inissititertornissai tullinnguupput, Randi Vestergaard Evaldsen nassuiaavoq.
Aatsitassarsiornermut tunngatillugu misissuininissamik piiaanissamillu qinnuteqaatit pisariinnerusumik suliarineqartarnissaat siullertut sulissutiginiarpaa.
Randi Vestergaard Evaldsen tamakku tamaasa saniatigut aamma Demokraatini siulittaasussatut sassarpoq. Siulittaasussamik februaarip 13-iani qinersisoqassaaq, tamatumanilu Justus Hansen Poul Hansenilu siulittasussatut aamma sassarput.
