Siunissaq pillugu ilisimatooq: Mittarfiit nutaat pillugit pilersaarutinut takorluuinissaq pingaaruteqarpoq

- Susoqarnissaata naatsorsorneqarsinnaannginnera pineqarpoq. Air Greenlandip Danmarkimut timmisartuussisarnera ajornerpaamik pisoqarnerani unissinnaavoq, sulili ajornerusoqarnerani Danmarkimut toqqaannartumik timmisartuussisoqarsinnaassanngilaq, Palludan Fremtidsforskningimi pisortaq ilisimatuullu pisortaat, Uffe Palludan oqarpoq.

Taassuma mittarfiit nutaat aaqqissuussaanerisa nunatsinnut qanoq sunniinissaannik eqqarsaateqarnermi tamakku ilaanissaata pingaaruteqassusia erseqqissaatigaa.

AAMMA ATUARUK Avannaata Kommuniata takornariat kommuninut eqqaamiuminut siammarusukkai

Uffe Palludanip saqqummiinermini Øresundimi ikaartarfik assersuutigaa, tassani takorluuisinnaaneq atorneqarani ikaartarfiup qanoq angallaffiiutigissanera eqqarsaatigineqarsimannginnerarpaa.

Pilersaarusiorneranimi assartukkat amerlinissaat taamaallaat naatsorsuutigineqarpoq, taamaammat tamatumunnga atatillugu nunap immikkoortuanik nutaamik Øresundip iluani angallattoqangaatsialerneranik kinguneqartumik pilersitsisoqarnissaa arajutsineqarluni.

- Siornatigummi angallattoqanngilaq. Taamaammat illoqarfimmi angallattoqarnera 0-imiippoq missiliuinermilu aamma taamatut, pissutigalugu ineriartortitsinermi procenti 0-iusoq 0-imik gangeraanni 0-iummat, taamaalilluni illoqarfimmit isiginissaa pinngitsoorpoq, Uffe Palludan oqarpoq.

AAMMA ATUARUK Siunnersuisoqatigiit isumasioqatigiissitsinerat pissarsiffiulluartoq

Taamaammat siumut naatsorsuinerit missiliuinerillu kisiisa atorlugit attaveqaqatigiinnerup nunamut qanoq sunniuteqarsinnaaneranik naatsorsuigaanni, sunniutissat Øresundimi ikaartarfimmitulli minnaarneqarsinnaapput.

Kalaallit Airportsip Nuummut tunngatillugu angalasut 4 procentpointinik amerlinissaat naatsorsorpai, mittarfillu taakku affaannik siuariarluni ingerlassaaq.

- Aamma ajunngilaq, angalasut taama ikitsigitillugit naatsorsuigaanni aningaasaqarneq ajorsissanngilaq. Angalasummi amerlippata, taava periarfissaq taanna mattunneqarsimassaaq. Angalasut inissaqartinneqanngikkunik amerlanavianngillat, Uffe Palludan oqarpoq.

AAMMA ATUARUK Mittarfittaassat qanoq atorluarneqarsinnaassappat